Astanada arnaýly áleýmettik qyzmet kórsetetin 18 uıym lıtsenzııa aldy
ASTANA. KAZINFORM — Qazaqstanda 2025 jylǵy 1 qańtardan bastap arnaýly áleýmettik qyzmet kórsetetin uıymdardy mindetti lıtsenzııalaý engizildi. Bul týraly Astana qalasynyń kommýnıkatsııalar qyzmetinde ótken brıfıngte Halyqty áleýmettik qorǵaý salasyndaǵy retteý jáne baqylaý komıtetiniń Astana qalasy boıynsha departamentiniń basshysy Asqar Aımaǵambetov málim etti.
Onyń aıtýynsha, bul tetik áleýmettik qyzmet kórsetý sapasyn arttyrýǵa, qyzmet alýshylardyń qaýipsizdigin qamtamasyz etýge jáne saladaǵy baqylaýdy kúsheıtýge baǵyttalǵan.
— Lıtsenzııalaý uıymdardyń biliktilik talaptaryna, kadrlyq quramyna, materıaldyq-tehnıkalyq bazasyna jáne qaýipsizdik talaptaryna sáıkestigin rastaıdy. Bul kórsetiletin qyzmet sapasyn jaqsartyp, áleýmettik qoldaýǵa muqtaj azamattardyń quqyqtaryn qorǵaýǵa yqpal etedi, — dedi Asqar Aımaǵambetov.
Departament basshysynyń aıtýynsha, búginde Astanada arnaýly áleýmettik qyzmet kórsetetin 20-dan astam uıym jumys isteıdi.
— 2026 jylǵy 1 shildedegi jaǵdaı boıynsha olardyń 18-i lıtsenzııa alǵan. Onyń ishinde 7-eýi kommýnaldyq memlekettik mekeme, 11-i úkimettik emes uıym. Qazir osy uıymdarda 7 myńnan astam astanalyq arnaýly áleýmettik qyzmet alyp otyr, — dedi ol.
Aımaǵambetov lıtsenzııalaý júıesi áleýmettik qyzmet kórsetetin uıymdardyń jumysyna biryńǵaı talap engizýge múmkindik beretinin atap ótti.
— Bul qyzmet sapasyn arttyryp qana qoımaı, qyzmet alýshylar úshin qaýipsiz ári qolaıly jaǵdaı qalyptastyrýǵa yqpal etedi. Sondaı-aq saladaǵy ashyqtyq pen jaýapkershilikti kúsheıtedi, — dedi departament basshysy.
Aıta keteıik, arnaýly áleýmettik qyzmetter ómirlik qıyn jaǵdaıǵa tap bolǵan azamattardy qoldaýǵa, olardyń qoǵamǵa beıimdelýine jáne áleýmettik máselelerin sheshýge baǵyttalǵan.
Buǵan deıin balalar lagerleri men ortalyqtaryn lıtsenzııalaý tártibi ózgeretini týraly jazǵan edik.
