Astanada «Armysyń, áz-Naýryz!» teatrlandyrylǵan qoıylymy ótedi
ASTANA. 17 naýryz. QazAqparat - 20 naýryz kúni Qazaq ulttyq óner ýnıversıtetinde Ulystyń uly kúni - Naýryz meıramyna oraı teatrlandyrylǵan kontserttik qoıylym ótedi,
dep habarlady atalǵan bilim ordasynyń baspasóz qyzmetinen.
Naýryz meıramyna oraı uıymdastyrylyp otyrǵan teatrlandyrylǵan kontserttik qoıylymda ýnıversıtet quramyndaǵy Ulttyq dástúrler teatrynyń ártisteri óz ónerlerin ortaǵa salady. Osy kúni sahnadan halyq folkloryndaǵy keıipkerlerin, atap aıtqanda, Qyzyr Ata, El Anasy, Aldar kóse, Qojanasyr, Tazsha bala, Shyq bermes Shyǵaıbaı, Dámetken, Bizbıke beınelerin kórýge bolady.
Aldar kóse beınesin ártis Janqaldybek Tólenbaev somdasa, Qojanasyrdy ártis Aqysh Omarov oınaıdy. Teatr ártisi Janar Shoqpanova Tazsha bala bolyp kórermenderdi kúlkige qaryq qylady. Sondaı-aq kúmis kómeı ánshiler Qazaqstannyń eńbek sińirgen qaıratkerleri Gúlzıra Bókeıhanqyzy men Elmıra Jańabergenovanyń oryndaýyndaǵy ásem ánderdi tyńdap, qulaq quryshyn qandyra alasyzdar.
Kontserttik qoıylymnyń rejısseri - QR eńbek sińirgen qaıratkeri Sáýlebek Asylhanuly. Óleńderin jazǵan - aqyn, Memlekettik syılyqtyń laýreaty Nesipbek Aıtuly. Sýretshisi - Ardaq Torǵabylov.
