Astanada «Armanda ketken bozdaqtar» atty kitaptyń tanystyrylymy bolady
Bul týraly búgin Astanadaǵy aptalyq brıfıngte QR Syrtqy ister mınıstrliginiń resmı ókili Asqar Ábdirahmanov aıtty, dep habarlaıdy QazAqparat.
Onyń sózine qaraǵanda, Qazaqstannyń Germanııadaǵy Elshiligi Saıası terror qurbandaryn eske alý jónindegi sakson memorıaldary birlestiginiń janyndaǵy qujattama ortalyǵymen birlese otyryp atalmysh kitapty shyǵarýǵa materıaldar jınaýda qyrýar jumystar atqarǵan. Kitapta Uly Otan soǵysy jyldarynda Germanııa aýmaǵyndaǵy kontsentratsııalyq lagerlerde qaza tapqan 6200-den astam qazaqstandyqtar týraly aqparattar berilgen. Sonymen qatar Qazaqstannnyń Avstrııadaǵy Elshiligi Boltsman atyndaǵy soǵys saldaryn zertteý ınstıtýtymen jáne Avstrııalyq qara krestpen birlesip 980 qazaqstandyqtar jerlengen oryndar týraly aqparattar berilgen estelik kitapty daıyndap shyǵarǵan. Bul kitaptyń tanystyrylymy sáýirdiń 27-de Venada ótken.
«Birinshi ret jaryq kórip otryǵan bul biregeı muraǵattyq materıaldar jıyntyǵy Qazaqstannyń ártúrli sanattaǵy azamattaryna sol kezeńdegi tarıhpen jáne otandastarymyzdyń jeńiske qosqan úlesimen jaqynyraq tanysýǵa múmkindik beredi», dedi resmı ókil.
A. Ábdirahmanovtyń aıtýynsha, kitaptyń tanystyrylý rásimine soǵys ardagerleri, Qazaqstannyń Ardagerler uıymynyń, Qorǵanys mınıstrliginiń, Syrtqy ister mınıstrliginiń, sheteldik dıplomatııalyq korpýstyń jáne BAQ ókilderi qatysatyn bolady.
