Astanada Arqaıym zamanynan syr shertetin halyqaralyq kórme ashyldy
ASTANA. QazAqparat - Elordada «Arqaıym - qalalar eli: Keńistik pen beıneler» atty halyqaralyq kórme ashyldy, dep habarlaıdy QazAqparat tilshisi.
Kórme qola dáýiriniń kúlli álemge tanymal arhelogııalyq eskertkishiniń ashylýynyń 30 jyldyǵyna, «Syntashty» mádenı-tarıhı kesheniniń zerttele bastaýynyń 45 jyldyǵyna jáne álemge qalalar elin ashqan arheolog, professor G.B.Zdanovıchtiń 80 jyldyǵyn toılaý aıasynda ótkizilip otyr.
Arqaıym - ejelgi adamzat órkenıetiniń bir bóligi, RF Chelıabi oblysynyń ońtústiginde ornalasqan qola ǵasyryndaǵy bekinisti qonys. Ony shyn mánindegi álemge keńinen tanymal, eń mańyzdy mádenı muralardyń arheologııalyq nysany dep ataýǵa bolady.
«Qola dáýiriniń eskertkishi 1987 jyly tabylǵan bolatyn. Arqaıymda keń aýqymdy qazba jumystary 1991 jyly Gennadıı Zdvnovıchtiń basshylyǵymen júrgizilgen. Qazba jumystary barysynda eskertkish qola dáýiriniń bekem bekinisi bolyp shyqty. Foto kórmede atalmysh eskertkishtiń sýretteri qoıylǵan», - deıdi QR Ulttyq mýzeı dırektory mindetin atqarýshy Abaı Satybaldın.
«Arqaıym - qalalar eli: Keńistik pen beıneler» atty halyqaralyq kórmesi ǵalymdar, arheologtar, tarıhshylar úshin ǵana emes, sonymen qatar adamzat tarıhyna qyzyǵýshylyq tanytyp zertteıtinder úshin asa qyzyqty deýge bolady. Arqaıym - arheologııalyq, sáýlettik ári tarıhı eskertkish qana emes, ol sol sııaqty álemniń kóptegen elderiniń arheologtary 150 jyldan astam ýaqyt boıy izdegen «arıılik zattaı keshenmen» tanystyratyn ashyq aspan astyndaǵy mýzeı.
Fotokórme stendtterine «Qalalar eli» eskertkishteriniń geografııalyq ornalasýy, bekinisti jáne bekinissiz qonystardyń aerofoto túsirilimderiniń maǵynasyn ashatyn materıaldar, ártúrli ýaqyt kezeńderindegi arheologııalyq qazba jumystarynyń fotosýretteri, sol sııaqty tiri tabıǵat pen onshaqty bekinisti qonystardyń búgingi dala kúıiniń avtorlarynyń fotosýretteri berilgen.
Kórme 2019 jyldyń 11 aqpanyna deıin jalǵasady.
