Astanada Arkaim 3D oıyn-saýyq qalashyǵy ashyldy - FOTO
ASTANA. QazAqparat - Elorda kúnin merekeleý aıasynda «Qazaq Eli» monýmentiniń aldyndaǵy alańda «Arqaıym - kúnniń qalasy» 3D ınteraktıvti oıyn-saýyq qalashyǵy ashyldy. Munda qazirgi zamanǵy tehnologııalardyń kómegimen astanalyqtar men qala turǵyndary ótkenimizdegi jáne bolashaqtaǵy atmosferany sezinedi, dep habarlaıdy qalalyq ákimdiktiń baspasóz qyzmeti.
Qalashyq tórt aımaqtan turady. Birinshi sferada «Uly dala jetistikteri» mýltımedııalyq galereıasy ornalasqan, onda Tas táýirinen 17-19 ǵǵ. deıingi damý evolıýtsııasy kórsetilgen. Ata-babalarymyz qoldan jasaǵan kúndelikti turmystaǵy zattar, zergerlik buıymdar, áshekeıler usynylǵan.
Júzdegen jyl buryn Shyǵys Qazaqstanda tabylǵan alǵashqy «Aq baýyr» observatorııasymen «Ashyq ǵaryshqa saıahat. Astana» proektsııalyq teatrynda tanysa alasyzdar. Bul sferada elordanyń ortalyǵynan ǵaryshqa sapar shegesiz, negizgi iri planetalardyń janynan ushyp, olar týraly aqparat alýyńyzǵa bolady. Saıahat «Juldyzdar soǵysy» stılindegi bı jarysymen aıaqtalady.
Festıvaldiń erekshelikteriniń biri - Aısha bıbi men Qarahan batyrdyń tragedııalyq oqıǵasy jaıly syr shertetin golografııalyq teatr.
Tórtinshi aımaq - jańasha árlengen etnıkalyq mýzyka usynylatyn «Welcome to Astana city!» kontserttik oıyn-saýyq alańy. Sonymen qatar, taqyryptyq ınteraktıvti aımaqtar da jasalǵan. Anımatorlardyń etno-fýtýrıstik kostıýmderi men osy stıldegi ádetten tys kádesyılar qalashyqta aıyryqsha atmosfera qalyptastyrady. Kontserttik baǵdarlama saǵat 19.00 bastalady.
- Bul etno jáne jańa tehnologııalardan - proektsııa men golografııadan qurylǵan biregeı joba. Qalashyq ekinshi ret jasalyp otyr. Byltyr golografııany jaı tehnologııa retinde kórsetsek, endi tutastaı teatrlandyrylǵan qoıylym usynbaqpyz. Bul úshin rejısserler, horeograftar, mýzykanttar shaqyryldy. Ótken jyly mýltımedııalyq galereıa art-stılde bolsa, bıyl tarıhymyzǵa arnalady. Orta eseppen sferalardy ornatýǵa jáne olardy qurastyrýǵa úsh apta ýaqyt jumsaldy, al jobanyń ózi bir jyldan astam ýaqytta ázirlendi, - dedi jobanyń úılestirýshisi Rınat Kýtdýsov.
