Astanada arhıv isin tsıfrlandyrýǵa arnalǵan JI jobalary tanystyryldy
ASTANA. KAZINFORM - Astanada Halyqaralyq arhıvter kúnine oraı «Digital Archive EXPO» III Halyqaralyq arhıvshiler kongresi ótip jatyr. QR Prezıdentiniń Arhıvi uıymdastyrǵan forýmǵa álemniń 30 elinen 500-den astam maman qatysyp jatyr.
Bıylǵy taqyryp arhıv salasyn tsıfrlandyrý jáne jasandy ıntellekt tehnologııalaryn engizý máselelerine arnaldy.
QR Prezıdenti Arhıviniń dırektory Álııa Mustafına kongress aıasynda alǵash ret kórme alańy uıymdastyrylyp, arhıvshilerdiń kúndelikti jumysyn jeńildetýge arnalǵan zamanaýı tehnologııalyq sheshimder usynylǵanyn aıtty.
– Biz arhıvshilerdiń kún saıyn qaıtalanatyn, kóp ýaqyt alatyn jumystaryn avtomattandyrýǵa múmkindik beretin tórt jobamyzdy tanystyryp otyrmyz. Bul – Prezıdent Arhıviniń óz ázirlemeleri, – dedi ol.
Olardyń alǵashqysy – AI Geotopography júıesi. Bul platforma arhıv qoımalaryn ıntellektýaldy basqarýǵa baǵyttalǵan. Onyń kómegimen arhıv qorlarynyń tsıfrlyq kartasy jasalyp, qujattardyń ornalasý qurylymy QR-tańbalaý arqyly júıelenedi. Sondaı-aq qoımalardyń tehnıkalyq pasporttaryn avtomatty túrde ázirleý múmkindigi qarastyrylǵan.
Ekinshi joba – AI Archival Recognition System. Ol qazaq jáne orys tilderindegi qoljazba ári mashınkamen terilgen qujattardy avtomatty túrde tanýǵa arnalǵan. Júıe qujattardaǵy derekter men aqparattyq óristerdi anyqtap, olardy bazaǵa aınaldyrýǵa múmkindik beredi. Ázirleýshilerdiń aıtýynsha, bul sheshim qujattardy óńdeý jyldamdyǵyn 40 esege arttyrǵan.
Úshinshi baǵyt – AI Mura Virtual Guide platformasy. Bul júıe arhıv materıaldarymen jumys isteýdi jańa formatqa shyǵarady: paıdalanýshylarǵa vırtýaldy gıd retinde qyzmet etip, qujattarmen tanysýǵa múmkindik beredi. Sonymen qatar ol arhıv qorlary boıynsha suraqtarǵa jaýap berip, qosymsha aqparat usyna alady.
Tórtinshi sheshim – QuralAI Assistant ıntellektýaldy kómekshisi. Bul qural arhıv qyzmetkerlerine qujattardy bastapqy saraptaýdan ótkizýge kómektesip, yqtımal qatelerdi anyqtaıdy jáne jumys sapasyn arttyrýǵa baǵyttalǵan usynystar beredi.
– Jalpy alǵanda, bul tórt joba arhıv jumysyn tolyq tsıfrlyq tsıklge kóshirýge baǵyttalǵan: saqtaýdan bastap izdeý, taldaý jáne paıdalanýǵa deıingi barlyq kezeńdi qamtıdy, - Álııa Mustafına.
Arhıv dırektorynyń sózinshe, bul sheshimderdiń maqsaty – arhıv mamanyn almastyrý emes.
– Olar mamandardyń jumysyn jeńildetip, ýaqytty kóp alatyn protsesterdi avtomattandyrýǵa baǵyttalyp otyr, – dep atap ótti ol.
Jalpy kórme aıasynda qujattardy saqtaý, tsıfrlandyrý jáne paıdalaný baǵytyndaǵy 20-dan astam ınnovatsııalyq sheshim usynylǵan.
Aıta keteıik, kongrestiń negizgi baǵdarlamasy halyqaralyq paneldik sessııalardan turady. Onda arhıvterdi tsıfrlandyrý, jasandy ıntellektini qujattyq murany saqtaýda paıdalaný, jańa býyn arhıvshilerin daıarlaý jáne arhıvtik ekojúıelerdi damytý máseleleri talqylanady.
Baǵdarlamada ıÝNESKO uıymdastyrǵan semınar men Ulybrıtanııa sarapshysynyń jasandy ıntellekt tehnologııalaryn bilim berý salasynda qoldaný tájirıbesine arnalǵan dárisi de bar. Sonymen qatar MURAtalks sarapshylar klýby alańynda arhıv salasynyń ózekti ári pikirtalas týdyratyn máseleleri ashyq talqylanatyn bolady.
III Halyqaralyq arhıvshiler kongresi 11 maýsymǵa deıin jalǵasady.
Eske salaıyq, Qazaqstanda Ulttyq tsıfrlyq arhıv júıesi ázirlenip jatyr.
