Astanada arheolog Zaınolla Samashevtiń 75 jyldyq mereıtoıyna arnalǵan sharalar ótti
Ǵylymı ortaǵa qazaq jerinen tabylǵan ekinshi «Altyn adamdy» jaryqqa shyǵarǵan ǵalym retinde tanymal arheolog Zaınolla Samashev bıyl 75 jasqa tolyp jatyr. Keıingi 10-15 jyldyń kóleminde ózi týyp-ósken ólke – Shyǵys Qazaqstan oblysynyń birneshe jerinen birneshe «Altyn adam» men qundy jádiger tapqan ǵalymdy quttyqtaýǵa elordadaǵy Ulttyq mýzeıge Qazaqstannyń ár óńirinen belgili ǵalymdar men qalamgerler, óner maıtalmandary men memlekettik organ basshylary jınaldy.
Mereıtoıda arheologııalyq jádiger kórmesi ashylyp, saltanatty jıyn ótti. Kórmege ǵylymı ortaǵa «Úrjar hanshaıymy», «Eleke sazynyń «Altyn adamy», «Berel hanzadasy», «Shilitki jádigeri» degen attarmen tanymal arheologııalyq tabystardyń eń qundy dúnıeleri qoıylypty.
Kórmeniń ashylýynda QR Mádenıet jáne sport mınıstriniń mindetin atqarýshy Nurǵısa Dáýeshev, Shyǵys Qazaqstan oblysy mádenıet basqarmasynyń basshysy Nurbolat Ahametjanov sóz sóılep, ǵalymnyń ıyǵyna japan jaýyp, baǵaly syılyqtar tabystady.
«Adam barda mereıtoı degen bola beredi ǵoı. Másele onda emes, mynaý tabylyp jatqan qundylyqta. Osy muranyń bári bizdiń halyqqa qyzmet atqarýy kerek. Bul – bizdiń kóne ortaǵasyrlyq tarıhymyzdy qalyptastyrýdaǵy negizgi derekkóz. Osy turǵyda biraz qyzmet atqaryp jatyrmyz. Byltyr Anglııaǵa baryp, dúnıejúzin dúr silkindirgen kórme ótkizip qaıtqanymyzdy bilesizder. Bizdiń ata-babalarymyz adamzat tarıhyna qandaı qundylyq syılaǵanyn áli de bolsa bile bermeıtin elder bar eken. Bizdiń maqsat – sondaı elderge bizdiń qandaı mádenıet pen órkenıettiń murageri ekenimizdi kórsetý. Arheologtarǵa búgingideı qoldaý bolyp tursa, ol maqsatqa jetemiz», - dedi Zaınolla Samashev.
Al saltanatty jıyn Prezıdent Qasym-Jomart Toqaevtyń ǵalymǵa joldaǵan quttyqtaý hatyn oqýmen bastaldy. Qazaq tarıhyn, kóshpeli mádenıet órkenıetiniń shejiresin saq pen ǵun dáýirine deıin tereńdetýge atsalysqan ǵalymǵa Mádenıet jáne sport, Qorǵanys, Ǵylym jáne joǵary bilim mınıstrleri de quttyqtap hat joldapty.
Shara aıasynda áıgili tarıhshy Búrkit Aıaǵan, jazýshy Álibek Asqarov, arheolog Ábdesh Tóleýbaev bastaǵan zııaly qaýym ókilderi quttyqtap, izgi tilekterin arnady. Jıynda Zaınolla Samashevtiń jetekshiligmen júrgizilgen arheologııalyq zertteýlerdiń báriniń túpnusqasy áýeli qazaq tilinde jarııalanatyny aıryqsha aıtyldy.
