Astanada ardager qalamgerdiń jańa kitaby jaryq kórdi

B.Jasqalıqyzy Batys Qazaqstan oblysynyń Jańaqala aýdanynda dúnıege kelip, biraz jyl Oral qalasynda turyp, eńbek etti. Sońǵy jyldary elordada turady.

Ómirlik joldasy Daıyr Dosaev elimizge belgili jýrnalıst, uzaq jyl Batys Qazaqstan oblystyq «Oral óńiri» gazetinde qyzmet etti, qazir zeınet demalysynda. Ekeýi ul-qyz ósirip, nemereler tárbıelep otyrǵan berekeli otbasy.

Baqyt Jasqalıeva – eńbekqor jýrnalıst. Maqalalary ár jyldary aýdandyq, oblystyq jáne respýblıkalyq gazetterge jarııalanǵan. Kitapqa iriktelip alynǵan shyǵarmalarynyń ózi 500 betten asyp otyr. Avtordyń taqyrypty tańdaı biletinin anyq ańǵarýǵa bolady. Qalamgerdiń kózdegen maqsaty – eńbegimen elge tanylǵan zamandastary nemese erekshe taǵdyr ıeleri týraly maqala jazyp, halyqqa tanystyrý, olardyń arman-tilegin jetkizý jáne kókeıdegi problemalaryna qoǵamnyń nazaryn aýdarý. Osy oraıda, qalam ıesiniń qol jetkizgen tabystary barshylyq.

Avtor «Elim úshin!» dep eren eńbek etip júrgen, biraq ózderin qarapaıym ustaıtyn jandar týraly jazyp, jaqsylyqtardyń jarshysy bola bilgen. Astanaǵa qonys aýdarǵan soń da, elordada turatyn ǵalym azamat, isker áıel-analar, ustazdar jaıly qalam terbep, «Adamǵa qurmet te, baqyt ta eseli eńbekpen keledi» degen qaǵıdany dáleldeı túsedi.

Qalamgerdiń eńbek maıtalmandary týraly jazǵan maqala, ocherkteri bastapqyda Jańaqala aýdandyq «Jańarǵan óńir» gazetine shyǵa bastaıdy. Odan keıin maqalalary oblystyq «Oral óńiri» gazetinde turaqty jaryq kóredi. Sondaı-aq Oral qalasyndaǵy «Edil-Jaıyq» pen «Júzdesý» basylymdarymen de shyǵarmashylyq tyǵyz baılanysta bolǵan. Al astanaǵa qonys aýdarǵan soń, erekshe keıipkerleri týraly týyndylaryn respýblıkalyq «Tórtinshi bılik» gazetine usynyp keledi.

Zııaly qaýym bas qosqan ortada avtordyń «Jyly júrek» kitabynyń tanystyrylymy bolyp ótti. Qazaqstannyń qurmetti qurylysshylary Maqsot Muhatov pen Maqsot Bekqulov, ardager jýrnalıst Baıan Muhambetqalıev jańa jınaq týraly jyly lebizderin bildirdi. Ardager ustaz Ardaq Qaıyrǵalıqyzy aq tilegin arnap, shashý shashty.

«Bul kitapty oqyǵan jandar adamdyq qundylyqtardyń baǵasyn biletin bolady. Ósip kele jatqan jas urpaq taǵylym alatyn tustary da kóp. Nemerelerimiz osy kitaptaǵy keıipkerlerdiń, ıaǵnı, el-jurtqa qadirli bolǵan asyl azamattardyń qasıetterin boılaryna jınap, úlgi alǵany jón», - dedi Maqsot Muhatov.

«Baqyt Jasqalıeva apamyzdyń «Jyly júrek» kitaby Narynnyń qumy da, eli de, eri de kıeli eldiń kórkem shejiresi desek bolady. Atasyn sózdiń óltirmeı, atyna bir sóz keltirmeı, árbir isi berekeli bolǵan apamyzdyń elge usynǵan «Jyly júrek» kitabynyń jylylyǵy ózin ǵana jylytpaı, ózgeni de jylytatynyna senemiz», - dedi «Tórtinshi bılik» gazetiniń dırektory – bas redaktory, jýrnalıst Tólemyrza Baltabaev.

Jınalǵan qaýym aldynda rızashylyǵyn jetkizgen kitap avtory B.Jasqalıeva: «Men qarapaıym ǵana myńdaǵan qazaq áıelderiniń birimin. Jazǵan dúnıelerimdi jarqyratyp shyǵaryp, qanshama jannyń júregine qýanysh syılaǵan buqaralyq aqparat quraldaryna aıtar alǵysym sheksiz. Bári de qoldaý kórsetti. Al kitaptaǵy keıipkerlerim týraly aıtar bolsam, Qudaı biledi, birazy tap qazir jumaqta júrgenine senimdimin. Sebebi olardyń bári de óte jaqsy, aq nıetti adamdar. Biraq olardyń ul-qyzdary, urpaǵy, jaqsy qarym-qatynasta bolǵan jaısańdary aramyzda júr. Ýaqyty kelip biri ata-anasyn, biri qurby-dostaryn, qyzmettes-áriptesterin saǵynyp izdegenderge bul kitabym sol izdeýshilerdiń qajetine jarap jatsa, onda meniń murat-maqsatymnyń oryndalǵany», - dedi tolqyp sóılep.

24 baspa tabaqtan turatyn kitaptyń birinshi bólimi «Jyldar jyrlaǵan jyrlar» dep atalady, munda avtordyń óleńderi berilgen. Al «Keıipkerlerim – súıikti erlerim» bóliginde maqalalary toptastyrylǵan.

Eske sala keteıik, budan buryn BQO-da jańa teatrdyń ult ustazyna arnalǵan spektaklmen ashylǵanyn jazǵan bolatynbyz.