Astanada árbir kóshe saýdageriniń QR-kody bolady
ASTANA. QazAqparat - Bıyl Astana qalasynyń kásipkerlerine, onyń ishinde kóshe saýdagerlerine QR-kodtar beriledi. Atalǵan tsıfrlyq tehnologııany paıdalaný bas qalanyń kóshelerindegi jabaıy saýdany azaıtýǵa múmkindik beredi, dep habarlaıdy Elorda Info tilshisi.
«Jabaıy saýdany azaıtý úshin biz tsıfrlyq tehnologııany, atap aıtqanda adal jáne zańdy túrde jumys isteıtin kásipkerlerdiń saýda nysandaryna QR-kodtar taǵaıyndaımyz. Jergilikti polıtsııa qyzmetiniń qyzmetkerlerine planshetter taratyp berdik. Sonyń kómegimen olar jedel túrde zańsyz jumys isteıtin kásipkerlerdi anyqtap, sol jerde E-aıyppul baǵdarlamasy boıynsha ákimshilik aıyppul jazyp beretin bolady», - dedi Elorda Info tilshisine Astana qalasynyń ınvestıtsııalar jáne kásipkerlikti damytý basqarmasy basshysynyń orynbasary Rysgúl Qaýǵabaeva.
Onyń aıtýynsha, tek 2017 jyly jergilikti polıtsııa qyzmetkerleri Jer qatynastary basqarmasy jáne aýdandyq ákimdiktermen birlesip, ruqsat etilmegen jerde saýdamen aınalysqany úshin 3096 adamǵa jalpy somasy 5 mln teńgeden astam aıyppul saldy. Sondaı-aq ótken jyly Astananyń kóshe saýdagerleri biryńǵaı formaǵa kóshken bolatyn.
«Biz biryńǵaı formany qoldan jasaý oqıǵasyn baqylaǵan joqpyz. Biraq kásipkerlerdiń aıtýynsha, keıbir jabaıy saýda jasaýshylar ol formany qoldan jasap alǵan», - dedi R.Qaýǵabaeva.
