Astanada arbadaǵy tennısten el chempıonaty bastaldy
ASTANA. KAZINFORM – Elordadaǵy «Dáýlet» tennıs ortalyǵynda arbadaǵy tennısten Qazaqstan chempıonatynyń saltanatty ashylý rásimi ótti.
Jarysqa Aqtóbe, Atyraý, Qaraǵandy, Qyzylorda jáne Mańǵystaý oblystarynan, sondaı-aq Astana men Almaty qalalarynan 40-qa jýyq sportshy qatysyp jatyr.
Múmkindigi shekteýli jandarǵa arnalǵan sporttyq daıarlaý ortalyǵynyń dırektory Bolatbek Dúketaevtyń aıtýynsha, arbadaǵy tennıs Qazaqstandaǵy qarqyndy damyp kele jatqan paralımpıadalyq sport túrleriniń biri sanalady.
«Bıyl arbadaǵy tennısten Qazaqstan chempıonaty besinshi ret ótkizilip otyr. Jarys qorytyndysy boıynsha ulttyq qurama sapyna enetin eń myqty sportshylar anyqtalady», – dedi ol.
Chempıonat erler, áıelder jáne aralas juptar arasynda Open jáne Quad sanattary boıynsha ótýde.
Týrnırde Astana qalasynyń namysyn Dinmuhamed Álııaqparov, Qaınar Nurlybek, Sofııa Stepanova jáne Álibek Ámenov qorǵaıdy.
Qazaqstan chempıonaty 20 maýsymǵa deıin jalǵasady. Onyń qorytyndysy boıynsha el quramasyna shaqyrtý alatyn úzdik sportshylar anyqtalady.
Aıta keteıik, Azııa birinshiliginde el namysyn qorǵaıtyn tennısshiler belgili boldy.
