Astanada aralas jekpe-jekten ótetin MMA «KUNLUNFIGHT» Álem birinshiligine 5 sportshymyz qatysady
ALMATY. QazAqparat- Bıylǵy jyldyń 4-shi qazanynda Astana qalasyndaǵy «Saryarqa» sport kesheninde aralas jekpe-jekten MMA «KUNLUNFIGHT 4 CAGE SERIES» dep atalatyn Álem birinshiligi ótedi. Oǵan 15 elden eń myqty degen 22 sportshy qatysady. Bul týraly búgin Almatyda ótken arnaıy baspasóz máslıhaty barysynda jarııa etildi.
«Bul álemdik dodada 57, 61, 66, 70, 77, 84, 93 jáne asa aýyr salmaq dárejesinde 12 jekpe-jek ótkiziledi. Solardyń ishinde 5 jekpe-jekke qazaq jigitteri shyǵyp, el namysyn qorǵaıdy. Olar: Beıbit Nazarov, Rýslan Hamzaev, Nurjan Tutqaev, Nurbergen Sháripov jáne Qazybek Áshimov. Sonymen qatar, AQSh-tan, Brazılııadan, Ońtústik Koreıadan, Qytaıdan jáne Eýropa elderinen erejsiz jekpe-jektiń eń myqty degen saıypqyrandary keledi», - dedi óz sózinde «Alem Fighters» kásipqoı sport klýbynyń prezıdenti Ardaq Nazarov. Sondaı-aq, ol inisi Beıbit Nazarovtyń osy týrnırde óziniń «Altyn belbeýin» ekinshi ret qorǵaıtynyn jetkizdi. «Ózderińiz bilesizder, Beıbit bıyl sáýir aıynda Almatyda ótken osyndaı Álem birinshiliginde «KUNLUNFIGHT» tujyrymy boıynsha Álem chempıony ataǵyn jeńip alǵan bolatyn. Keıin, kóp uzamaı maýsym aıynda Beıjiń qalasynda ótken kezekti álemdik dodada ol jergilikti saıypqyran Býhao Tıandy jeńip, óz belbeýin birinshi ret qorǵap qaldy. Endi aldaǵy týrnırde ekinshi ret qorǵaıtyn bolady», - dedi A. Nazarov. Sondaı-aq, «Alem Fighters» kásipqoı sport klýbynyń prezıdenti Astanada ótetin Álem birinshiligin tamashalýǵa Elbasy Nursultan Nazarbaevtyń kelýi múmkindigin aıtty. «Bul álemdik dodany tamashalaýǵa QR Prezıdenti Nursultan Nazarbaev keledi dep kútip otyrmyz. Sonymen qatar, Astana ákimdigi, Mádenıet jáne spor mınıstrliginiń ókilderi, Parlament Májilisiniń depýtattary keledi degen jospar bar. Taǵy bir jańalyq, qtýrnırdiń qurmetti qonaǵy retinde aralas jekpe-jektiń belgili sheberi, ataqty kıkbokser, «Straıkfors» tujyrymynyń eks chempıony gollandııalyq sportshy Alıstar Overım kelýi múmkin. Qazir onymeen kelissózder júrgizilip jatyr», - dedi A. Nazarov. Aıta ketelik, bul birinshiliktiń basty uıymdastyrýshysy - aralas jekpe-jek boıynsha KUNLUN FIGHT CHINA dúnıejúzilik uıymy.
