Astanada arab memleketteri, Eýropa jáne TMD elderiniń aımaqtyq forýmy ótti
Astana ekonomıkalyq forýmy - 2017 aıasynda ótken sharaǵa arab, Eýropa jáne TMD memleketteri kiretin 40 eldiń Ońtústik-Ońtústik yntymaqtastyǵy boıynsha ulttyq úılestirýshi ortalyqtary men damý salasyndaǵy ınstıtýt ókilderi jınaldy.
Atap aıtqanda, forým jumysyna QR Ulttyq ekonomıka mınıstrligi, BUU Damý baǵdarlamasynyń Eýropa, TMD jáne Eýropa elderi boıynsha aımaqtyq Bıýrosy, BUU Ońtústik-Ońtústik yntymaqtastyǵy basqarmasy, Astanadaǵy memlekettik qyzmet salasyndaǵy óńirlik hab, Islam damý banki, Islam elderine arnalǵan Statıstıkalyq, ekonomıkalyq jáne áleýmettik zertteýler ınstıtýty jetekshileri men ózge de halyqaralyq uıymdardyń joǵary laýazymdy tulǵalary qatysty.
«Astanadaǵy memlekettik qyzmet salasyndaǵy óńirlik haby Qazaqstan úkimeti men BUU Damý Baǵdarlamasynyń aldyńǵy qatarly bastamasy bola otyryp, qurylǵannan bastap, áriptestikke, memlekettik qyzmet salasyndaǵy áleýetti arttyrýǵa, «teń teńimen» qaǵıdaty boıynsha oqytýǵa baǵyttalǵan, kún tártibi ıkemdi ári azamattar suranysyn baǵdar tutatyn kópjaqty platforma retinde málim», - dedi Astanadaǵy memlekettik qyzmet salasyndaǵy Óńirlik habtyń basqarýshy komıtet tóraǵasy Álıhan Baımenov forýmnyń ashylý barysynda.
Taraptar forýmda Ońtústik-Ońtústik jáne Úsh jaqty yntymaqtastyqtyń áriptestik máselerin talqylap, onyń ishinde «jasyl» ekonomıka boıynsha yntymaqtastyqty damytýǵa basa nazar aýdardy jáne Ońtústik-Ońtústik yntymaqtastyǵy baǵytyndaǵy bilim men tehnologııalar almasýǵa jeke sektordy tartý joldaryn qarastyrdy.
Sonymen birge, BUU Bas hatshysynyń kómekshisi, BUU Damý baǵdarlamasy Eýropa jáne TMD elderi boıynsha Aımaqtyq bıýro dırektory Djıhan Sultanoglý sóz sóılep, Eýropa jáne TMD elderindegi adam resýrstarynyń turaqty damýy salasyn ilgeriletýdegi Ońtústik-Ońtústik jáne úshjaqty yntymaqtastyq týraly birinshi aımaqtyq esebimen tanystyrdy.
Aıta keteıik, Astanadaǵy memlekettik qyzmet salasyndaǵy Óńirlik hab - aımaq elderiniń memlekettik qyzmet salasynda úzdiksiz tájirıbe men bilim almasýynyń ınstıtýtsıonaldy alańy. Qazirgi tańda habqa 36 memleket, onyń ishinde Amerıka, EO, TMD, Kavkaz jáne ASEAN elderi múshe. Ońtústik-Ońtústik yntymaqtastyǵy BUU aıasynda álemniń damýshy elderi arasynda ózara qarym-qatynas men resýrstar, tehnologııalar jáne bilim almasýdy kózdeıdi.
