Astanada aptap ystyq: «Aqyldy» aıaldamalardyń jaı-kúıi qalaı
Elordada dástúrli avtobýs aıaldamalarynan bólek, «aqyldy» aıaldamalar bar. Olar qala boıynsha birneshe jerde ornalasqan. Atalǵan aqyldy aıaldalamalar qystygúni jyly, jaz mezgilinde salqyn bolyp turýy tıis.
QazAqparat tilshileri qala boıynsha 10 «aqyldy» aıaldamadaǵy jaǵdaıdy baqylap kórdi. Onyń bireýinde ǵana aýa baptaǵysh jumys istep tur. Atalǵan aıaldama Respýblıka dańǵyly men Kenesary kóshesiniń qıylysynda ornalasqan. Іshinde shaǵyn market bar, biraq jolaýshylarǵa oryn az, ıaǵnı aıaldama tar. Sol sebepti jolaýshylardyń kóbi avtobýsty syrtta kútip tur.
«Kóbine avtobýsqa osy aıaldama arqyly minemin (aıaldama Táýelsizdik dańǵylynda ornalasqan). Esigi synǵan, jabylmaıdy. Esiktiń jabylmaıtyny ásirese qysta qıyn. Taǵy bir problema – aıaldama tazartylmaıdy, qashan qarasań qoqys jatady. Sol sııaqty Beıbitshilik kóshesindegi aıaldamadan da jıi minemin. Ol jaqta da jaǵdaı máz emes. Aıaldamalarda kondıtsıoner tur, sol sııaqty WiFi bolýy tıis, biraq olardyń eshqaısysy istemeıdi. Onyń ústine sońǵy kúnderi aptap ystyq», - dedi avtobýs kútip turǵan astanalyq jolaýshy Aıgúl Smaǵulova.
Baqylaý barysynda Máńgilik el dańǵyly boıynda ornalasqan birneshe «smart» aıaldamanyń talapqa saı istemeı turǵany anyqtaldy. Atap aıtqanda, kondıtsıoner qosylmaǵan, tıisinshe ishi janyp tur. Al jolaýshylar syrtta aǵashtardyń kóleńkesin panalaýda.
«Aıaldama jolaýshylar úshin yńǵaıly, kontsıoner arasynda isteıdi. Biraq, búgin istemeı tur. Avtobýstardyń ishinde de kondıtsıoner bar. Ystyq qıynǵa soǵyp jatqan joq», - deıdi elorda turǵyny Janar Muhamedjanova.
Jolaýshy Hadısha Ámreeva «Orbıta» saýda úıi mańynda ornalasqan «aqyldy» aıaldamanyń qysta ǵana jumys isteıtinin aıtty.
«Qysta istep turdy, al osy kúnderi ystyqta qaıda tyǵylamyz? Meniń qysymym joǵary, ystyqqa shydamaımyn, kóbine úıde otyramyn. Degenmen, arasynda sharýalarmen shyǵýǵa týra keledi. Keıde aıaldamany qańǵybastar panalaıdy. Olar uıyqtap jatady nemese ishimdik iship otyrady. Olardy qýyp jiberýge aıaısyń», - deıdi astanalyq.
Sondaı-aq jol-jónekeı (Túrkistan – Kereı-Jánibek kósheleriniń qıylysy) aıaldamanyń ózi joq, tek belgi ǵana qoıylǵan jaǵdaıdy baıqadyq. Aǵashtyń kóleńkesinde 2 jolaýshy avtobýs kútip turdy.
Osy oraıda bizdiń redaktsııa qala aıaldamalaryndaǵy jaǵdaıdyń mán-jaıyn anyqtaý maqsatynda elorda ákimdigine saýal joldady.
Eske sala ketsek, qalalyq City Transportation Systems kólik kompanııasynyń byltyrǵy málimetinshe, búginde elordada jalpy sany 164 «aqyldy» aıaldama bar.
Aıta ketsek, keshe Qazgıdromet elorda men 17 óńirdegi aptap ystyqqa baılanysty eskertý jarııalaǵan edi.