Astanada apta saıynǵy jármeńkelerde 1,3 myń tonna ónim saýdalanǵan
ASTANA. QazAqparat - Astanada 6 aıdyń ishinde apta saıynǵy 75 jármeńkede 1 390 tonna ónim saýdalanǵan, dep habarlaıdy qala ákimdiginiń saıty.
Búgin elorda máslıhatynyń depýtattary qalanyń azyq-túlik qaýipsizdigin qamtamasyz etý máselelerin jáne azyq-túlik taýarlarynyń baǵalaryn turaqtandyrý sharalaryn talqylady.
Astana qalasynyń aýyl sharýashylyq basqarmasynyń málimetterine sáıkes, búgingi kúni Aqmola, Qaraǵandy, Pavlodar, Soltústik Qazaqstan oblystarymen, alys jáne jaqyn shet eldermen tamaq ónimderiniń jetkizilimderi jolǵa qoıylǵan. Elordada taýar óndirýshiler úshin qalanyń ishki naryǵyna erkin kirý qamtamasyz etilgen, jer telimin bólý men óndiristik ınfraqurylymdy tartýdan bastap, óndiriletin ónimdi ótkizýge deıin jan-jaqty qoldaý kórsetiledi. Atap aıtqanda, ústimizdegi jyldyń shilde aıynda Almaty jáne Qyzylorda oblystarynan qant pen kúrish jetkizilgen.
Qazaqstan Respýblıkasynyń 25 jyldyǵyn merekeleý sheńberinde «Qýatty óńir - Qýatty Qazaqstan» degen uranmen óńirler kúnderi uıymdastyryldy, shara aıasynda 10 dástúrli aýyl sharýashylyq jármeńkesi ótti.
2016 jyldyń sáýir-qazan aılarynda 75 apta saıynǵy jármeńke ótkizilip, 1 390 tonna ónim, sonyń ishinde et ónimderi 321 tonna, 25 tonna sút ónimderi, 943 tonna kókónis, 30,5 tonna qant jáne 43,5 tonna basqa taýarlar satyldy. Astanada qala turǵyndaryn tamaq ónimderimen qamtamasyz etetin agroónerkásip kesheniniń 72 sýbektisi bar. Sonyń ishinde un tartatyn 9 kásiporyn, nan-toqash ónimderin óndirýshi 41 kásiporyn, shujyq ónimderin óndirýshi - 5, sút ónimderin shyǵaratyn bir kásiporyn, 8 kókónis qoımasy, bir jylyjaı kesheni, 2 aýyl sharýashylyq taýarlaryn óndirýshi bar. Deldaldardyń sanyn qysqartý maqsatynda qalada 5 saýda-logıstıkalyq ortalyq ashyldy.
Azyq-túlik ónimderiniń baǵasy da mańyzdy másele. Baǵalardy turaqtandyrý úshin birneshe oblyspen saýda-ekonomıkalyq qarym-qatynastar týraly memorandýmǵa qol qoıyldy, onda ónimderdi óndirýshilerdiń baǵasymen satý qarastyrylǵan, dep habarlady basqarmadan.
Sonymen birge, depýtattar ýaqytyly qarjylandyrmaý, óndiris, azyq-túlik ónimderin óńdeý jáne saqtaý salalarynda ınvestıtsııalyq jobalardy paıdalanýǵa tapsyrý merzimderin saqtamaý, jáne sapasyz ónimderdi satý azyq-túlik ónimderi baǵasynyń qymbattaýyna alyp keletinin aıtty.
Otyrystyń qorytyndysy boıynsha et-sút ónimderiniń jetkizilimderine baqylaý jasaý, otandyq kásiporyndardy ónim shyǵarýǵa jáne onyń sapasyn arttyrýǵa yntalandyrý sharalaryn kúsheıtý boıynsha usynys-keńester berildi.
