Astanada apta saıyn sotqa júgingen 90 jup ajyrasýdan bas tartady

ASTANA. KAZINFORM – Byltyr Astanada ajyrasý týraly talap aryzben sotqa júgingen 4 myńnan astam juptyń 1500-den astamy qaıta tatýlasqan.

Prezıdent is basqarmasynyń Parlamentarızm ınstıtýty uıymdastyrǵan dóńgelek ústelde medıatsııany damytý máseleleri talqylandy. 

Osy is-sharada Astana qalasynyń kámeletke tolmaǵandar ister jónindegi mamandandyrylǵan aýdanaralyq sotynyń tóraǵasy Leıla Zınasheva Medıatorlar palatasyn qurý arqyly salanyń jumysyn birizdendirýdi usyndy.

Leıla Zınasheva Kazinform tilshisine bergen suhbatynda otbasylyq isterdegi medıatsııanyń róli týraly pikir bildirdi. 

«Astana qalasynyń kámeletke tolmaǵandar ister jónindegi mamandandyrylǵan aýdanaralyq sotyna bir jylda 4 myńnan astam is ajyrasý talabymen túsedi. Sonyń ishinde 1500-den astam is tatýlasy arqyly sheshiledi. ıAǵnı, juptar ajyrasýdan bas tartady», - deıdi ol.

Sýdıanyń aıtýyna qaraǵanda, ajyrasý nıetimen sot ǵımaratyna kelgen juptardyń keıbiri tipti sýdıanyń aldyna jetpeı jatyp tatýlasyp úlgeredi.

«Bizde 14 sýdıa bar. Apta saıyn solardyń aldyna kelgen 75-ten astam jup qaıta tatýlasady. Bizge is jetpeı turyp medıatorlar men psıhologtar jumys isteıdi. Olardyń aldynan aptasyna keminde 15 jup tatýlasyp qaıtady. Sonda Astananyń ózinde aptasyna 90 jup ajyrasý nıetinen bas tartady degen sóz. Negizi medıatsııa qyzmetin damyta tússek, medıatorlardyń sapasyn kótersek, sotqa jetpeı tatýlasatyn juptardyń sany budan da kóp bolar edi. Sot aldyna kelgennen keıin onyń bári qujatqa qattalyp, adamnyń quqyqtyq statıstıkasyna enedi. Onyń syrtynda sot aldyndaǵy psıhologııalyq júkteme bar», - deıdi Leıla Zınasheva.