Astanada apatty jaǵdaıda qonǵan Boıng ushaǵyna qatysty tergeý júrgizilýde
ASTANA. QazAqparat - Astana áýejaıyna qonǵan «Skat» áýe kompanııasynyń Boıng-757 ushaǵynyń tejegish júıesi isten shyǵyp ketken. Bul týraly «QazAqparat» agenttigine Astana áýejaıynan habarlady.
«2014 jyldyń 1 sáýirinde 4 saǵat 10 mınýt shamasynda Bangkok-Astana baǵytyndaǵy «Skat» áýe kompanııasynyń Boıng-757 ushaǵynyń sol jaq shassıi qoný barysynda istemeı qaldy, saldarynan tórt dóńgelektiń jeli shyǵyp, tútindedi», - dep jazylǵan habarlamada.
Ushaq bortynda 171 jolaýshy men ekıpajdyń 9 qyzmetkeri bolǵan. Onyń ishinde 49-y - balalar. Barlyq jolaýshylar qaýipsiz jerge kóshirildi. Tergeý jumystary bastaldy.
