Astanada apatty úılerden 4,7 myń adam kóshiriledi

Astana qalasynda apatty úılerden 4 710 adamdy kóshirý josparlanyp otyr. Bul týraly elorda ákimi Jeńis Qasymbek búgin Ortalyq kommýnıkatsııalar qyzmetinde ótken baspasóz máslıhatynda aıtty, dep habarlaıdy Kazinform.

«Qurylys salasy elorda ekonomıkasynyń negizgi draıveri bolyp qala beredi. Qazirgi ýaqytta 3,4 mln sharshy metr turǵyn úı paıdalanýǵa berildi. Bıyl jeńildetilgen memlekettik baǵdarlamalar boıynsha azamattardyń ártúrli sanattary úshin 5200 páter berý týraly mindet qoıdyq», - dedi elorda basshysy.

Ákimniń aıtýynsha, onyń ishinde jetim balalar, kópbalaly analar, áleýmettik osal azamattar, sonymen qatar jumys isteıtin jastar bar.

«Qazir qujattardy rásimdeý boıynsha tıisti jumystar júrip jatyr. Kelesi jyldyń basynda – qańtar aıynda kezekte turǵandar óz úılerine kiredi. Sonymen birge Astanada renovatsııa baǵdarlamasy bekitildi. 2029 jylǵa deıin 206 apatty úıden 4 710 turǵyndy kóshirý josparlanǵan. Bul jumys bastalyp ketti. Bıyl 400 páter osyndaı azamattarǵa berilse, kelesi jyly – taǵy 700 páter. Ári qaraı jylyna 1 myń páterden beriledi dep josparlap otyrmyz», - dedi Jeńis Qasymbek.

Aıta keteıik, Jeńis Qasymbek Astana qalasynyń áleýmettik-ekonomıkalyq damýy týraly qorytyndy esep berip jatyr.