Astanada apaly-sińlili eki áıel jynystyq qyzmet kórsetetin prıton uıymdastyrǵan
ASTANA. KAZINFORM - Astana qalasynda prıton uıymdastyrý, onyń ishinde kámeletke tolmaǵandardy tartý arqyly uıymdastyrylǵan qylmystyq toptyń 15 múshesine qatysty qylmystyq isti tergep-tekserý aıaqtaldy.
Astana qalalyq prokýratýrasy baspasóz qyzmetiniń habarlaýynsha, tergeý barysynda 2023 jyldan 2025 jylǵa deıingi kezeńde eki apaly-sińlili óz jubaılarymen birge turǵyn úı keshenderinde jynystyq qyzmet kórsetý úshin prıton uıymdastyrǵany anyqtaldy.
-Uıymdasqan qylmystyq toptyń quramyna kúzetshiler, ákimshiler, sondaı-aq áleýmettik jeliler men messendjerler arqyly qyzmetterdi jarnamalaýmen aınalysqan tulǵalar kirgen. Uıymdastyrýshylar qaladaǵy túngi klýbtardan qyzdardy izdep, olarǵa joǵary tabys, turǵylyqty úı, qaýipsizdik jáne qupııalylyqty qamtamasyz etýge ýáde bergen,-delingen habarlamada.
Budan bólek, qylmyskerler klıentterdiń alkogoldik masań kúıin paıdalanyp, olarǵa kúsh qoldanyp, aqshalaı qarajattaryn bopsalaǵan, sondaı-aq olardy jalǵa alynǵan páterlerde zańsyz ustaǵan.
Barlyq 15 qatysýshy ustalyp, olarǵa qatysty kúzetpen ustaý jáne úıqamaq túrindegi bultartpaý sharalary qoldanylǵan.
Elorda prokýratýrasy qylmystyq isti sotqa joldady.
Aıyptalýshylardyń áreketterine túpkilikti quqyqtyq baǵa sot otyrysy barysynda beriledi.
Osyǵan deıin Almatyda 70-ten astam jezóksheler úıi anyqtalǵany týraly jazdyq.
