Taıaý Shyǵys baǵytyndaǵy áýe qatynasy 10 naýryzǵa deıin toqtatyldy

ASTANA. KAZINFORM — Air Astana Taıaý Shyǵysqa reısterdi toqtatý merzimin uzartty. 

— Air Astana kompanııalar toby Dýbaı, Jıdda, Medına jáne Dohaǵa turaqty reısterdi 10 naýryzdy qosa alǵanǵa deıin toqtatady. Al atalǵan qalalarǵa bıletterdi satý 17 naýryzǵa deıin ýaqytsha toqtatyldy. Tegin qaıta brondaý 30 sáýirdi qosa alǵanǵa deıin, al bıletterdi qaıtarý 11 naýryzdy qosa alǵanǵa deıin qoljetimdi, — delingen habarlamada.

Áýe kompanııasy Taıaý Shyǵystaǵy jaǵdaıdy muqııat qadaǵalaýdy jalǵastyrady.

Budan buryn 4 naýryzdan 5 naýryzǵa qaraǵan túni Qazaqstanǵa Air Astana jáne Flydubai áýe kompanııalary 5 reıs jasaǵany belgili boldy.

Sondaı-aq, búgin tańda ushyp kelgen 180 qazaqstandyq Atyraýǵa qondy. Olar Taıaý Shyǵys elderindegi ahýalǵa qatysty pikir bildirdi.