Astanada ánshi Gúlzıra Bókeıhanqyzynyń «Júregimnen shyqqan án» atty shyǵarmashylyq keshi ótedi
ASTANA. 15 maýsym. QazAqparat - 19 maýsym Astanada «Nazarbaev ortalyǵynyń» konferents-zalynda QR eńbek sińirgen qaıratkeri Gúlzıra Bókeıhanqyzynyń «Júregimnen shyqqan án» atty úntaspasynyń tusaýkeserine baılanysty buqaralyq aqparat quraldarynyń ókilderi úshin baspasóz jıyny jáne ánshiniń jeke kontserti ótedi.
Bul týraly Astana memlekettik fılarmonııasynyń baspasóz qyzmeti habarlady.
Astananyń 15-jyldyǵyna arnalǵan bul keshte ánshiniń repertýaryndaǵy úzdik týyndylar: halyq ánderi, halyq kompozıtorlarynyń ánderi men kúıleri, bı oryndalady. Kontsertke «Saryarqa» ult-aspaptar ansambli, «Shalqyma» halyq bıi ansambli, mýltı-ınstrýmentalıst, kompozıtor «Mádenıet qaıratkeri» Edil Qusaıynov, Qazaqstan Jastar odaǵy syılyǵynyń ıegeri Nurǵalı Turlybekov jáne halyq áni bóliminiń ártisteri qatysady.
Gúlzıra Bókeıhan - Astana qalasy ákimdiginiń Memlekettik fılarmonııasy halyq áni bóliminiń ánshisi. Qytaı Halyq Respýblıkasynyń Shynjań ólkesinde dúnıege kelgen. Jastaıynan ónerge jaqyn bolǵan. 1983 jyly Іle oblystyq óner kolledjine túsip, 1986 jyly támamdady. Іle oblystyq Qazaq án-bı teatrynda qyzmet atqardy. 1988-1993 jyldar aralyǵynda Beıjiń Ulttyq ýnıversıtetiniń mýzykalyq fakýltetinde ánshilik mamandyǵy boıynsha bakalavrıattty aıaqtady. Gúlzıra Bókeıhan atamekenge 1999 jyly bet alyp, Qurmanǵazy atyndaǵy konservatorııanyń aspırantýrasyna túsip, KSRO halyq ártisi Roza Jamanovanyń klasynda 2001 jyly oqýyn aıaqtaıdy. Astanaǵa jumysqa shaqyrylady.
1997 jyly Qytaılyq jastar festıvaliniń júldegeri; 1999 jyly Almatyda ótken respýblıkalyq Áset Beıseýov atyndaǵy «Armandastar» baıqaýynyń 2 oryn júldegeri; 2001 jyly Astanada halyqaralyq «Shabyt» festıvaliniń 2 oryn ıegeri; 2001 jyly respýblıkalyq Kúlásh Baıseıitova atyndaǵy ánshiler baıqaýynyń «Kúlásh repertýarynyń úzdik oryndaýshysy» dıplomynyń ıegeri atandy. 2001 jyldan búgingi kúnge deıin Germanııa, Birikken Arab Ámirligi, Shvetsııa, Túrkııa, Qytaı, Reseı, Mońǵolııa, Ázirbaıjan, Úndistan, t.b. elderde gastroldik issaparlarda bolyp, álemniń kóptegen eliniń kórermenderin qazaq ónerimen tánti etip júr.
Ánshilik darynymen qatar akterlik talabyn da shyńdap keledi. 1993 jyly Shynjań kınostýdııasy túsirgen «Eljaý Kúnbı» telefılminde basty róldegi Gúlmandy tamasha somdady. Kúlásh Baıseıitova atyndaǵy opera jáne balet teatrynyń shaqyrýymen «Qyz Jibek» operasynda Jibektiń rólin somdap, qazaq qyzdaryna tán sulýlyq pen parasattylyqtyń úılesimdiligin kórermen júregine jetkize bildi. 2007 jyly «Qyzdáýren» atty jeke CD jınaǵyn halyqqa usyndy.
Erekshe aıta keter jaıt, Gúlzıra Bókeıhan atamekenge oralǵan soń Altaı-Tarbaǵataıda kóneniń kózine aınalǵan, osy kúni birneshe kásibı mamandar ǵana ıgergen, halyqtyq qazyna sanalatyn ánderdi jańasha óńdep, Qurmanǵazy atyndaǵy ulttyq aspaptar orkestri men Nurǵısa Tilendıev atyndaǵy qazaq etnografııalyq orkestrine túsirip, jańasha oryndaýda kontsertter berip, buqaralyq aqparat quraldary arqyly nasıhattap júr.
