Astanada Andjelına Djolıge «qazaqsha til bitti»
ASTANA. QazAqparat - Qazaqstandyq aktrısa Gúlnaz Áýesbaeva Andjelına Djolıdiń bar bolmysy men kóńil-kúıin aına-qatesiz jetkize bilýimen kórermenniń ystyq yqylasyna bólendi. Sóz aldyn-ala kórsetilimi 27 mamyr kúni Astana qalasynda ótken, basty rólin álemge áıgili aktrısa somdaǵan, qazaq tiline aýdarylǵan «Malefısenta» fılmi týraly bolyp otyr.
Aıta keteıik, bul «Bolashaq» qaýymdastyǵynyń qoldaýymen aýdarylǵan segizinshi gollıvýdtyq týyndy. Uıymdastyrýshylar osylaısha qazaqstandyq kórermenderge álemdegi qyzyqty kınotýyndylardyń birin qazaq tilinde tamashalaý múmkindigin usyndy.
«Dısneı» kınostýdııasynyń ókilderiniń qadaǵalaýymen júzege asatyn dýblıajdaý protsesi arqyly kıno óneriniń shyǵarmalary aǵylshyn tilinen tikeleı qazaq tiline aýdarylady, bul asa ter tógýdi talap etetin qajyrly iske shamamen 200-ge jýyq kásibı akterler tartylady. Shynaıy súıispenshilikti, senim men ómir qundylyqtaryn nasıhattaýdy maqsat etken «Malefısenta» fılminde ataqty Andjelına Djolıdi dybystaǵan Gúlnaz Áýesbaeva: «Róldi dybystaý ony oınap shyqqanmen birdeı. Sol sebepti maǵan bul joly ońaıyraq boldy. Sebebi, men Djolıdi tek aktrısa retinde ǵana emes, qoǵam qaıratkeri, ana, qaıyrymdy jan retinde asa qurmetteımin. Ol óte tartymdy tulǵa», - deıdi. Esterińizge salaıyq, atalmysh týyndy el kınoteatrlarynda qazaq jáne orys tilderinde 29 mamyrdan bastap kórsetiledi.
