Astanada ana týraly telehıkaıanyń tusaýy kesildi
ASTANA. QazAqparat - Astanada shynaıy oqıǵaǵa negizdelgen «Ana júregi» telehıkaıasynyń tusaýkeseri ótti, dep habarlaıdy «QazAqparat» HAA tilshisi.
Tusaýy «Saryarqa» OSO-da kesilgen telehıkaıada Almaty qalasyndaǵy aýdandyq sottardyń birinde sýdıa bolyp qyzmet atqaratyn Raıgúl men onyń uly Armannyń ómiri baıandalady. Raıgúl aqylyna kórki saı bolady. Biraq minezi óte qatal bolady. Mineziniń tik bolyp qalyptasýyna jumysy, qundaqtaǵy sábıimen jalǵyz qalýy, qıyndyqqa toly ómiri áser etedi. Basty keıipkerdiń ómirinde jalǵyz uly men jumysy ǵana bar. Sonymen qatar, dramada EKO kómegimen eki balanyń dúnıege kelýi, Raıgúlge jasalǵan quıtyrqy áreketter men alaıaqtyq áreketter de sýretteledi.
«Bıylǵy jańa televızııalyq maýsymǵa «Habar» agenttigi kóptegen áleýmettik telehıkaıalardy daıyndaǵan bolatyn. Munyń aldynda qarttardyń taǵdyryna arnalǵan «Qarııa» degen telehıkaıa kórermenge jol tartsa, áıel dárigerlerdiń qyzyǵy men shyǵyjyn sýrettteıtin «Abzal jan» atty týyndy kórsetildi. Osydan bir apta buryn ǵana zeınet jasyna shyqqan keıin de ómir bar ekenin dáleldeıtin, egde tartqan adamdardyń erekshe mahabbat sezimin pash etken «Mezgilsiz mahabbat» atty áleýmettik serıalymyz kórsetile bastaǵan bolatyn. Endi mine, búgin kezek «Ana júregi» atty otandyq melodramaǵa kelip otyr. Ana degen uǵymnyń ár qazaq úshin, musylman úshin qasteri erekshe ekenin bilesizder. «Jumaq ananyń aıaǵynyń astynda» degen qasıetti sóz beker aıtylmaǵany túsinikti. Osy qasıetti uǵymdardy tý etip alyp, resjısser Sanjar Omarov, prodıýsserler Gúlnur Mamasarıpova men Gúlbarshyn Zaıyrova birigip, jańa áleýmettik dramanyń kontseptsııasyn bizge usyndy», - «Habar» agenttigi AQ-nyń basqarma tórǵasynyń orynbasary Rınat Kertaev.
Onyń aıtýynsha, serıaldyń keıipkerleri kúndelikti ómirden alynǵan.
«Onyń keıipkerleri HHІ ǵasyrdaǵy qazaq qoǵamynda ómir súretin adamdar. Biraq endi kıno bolǵannan keıin serıalǵa saı yńǵaılaýǵa tyrystyq. Dese de, bir biletin dúnıe - bul oqıǵa 2000 jyldardyń basynda Qazaqstanda bolǵan. Onyń keıipkerleriniń bar. Bul kúnde Almaty qalasynda turyp jatyr. Serıaldy kórip otyrǵanda bir jaǵynan oılanyp, qarapaıym zamandastardyń ómirindegi túrli túıtkilderdi baıqap, oı túıýge múmkindik alarsyzdar degen oıdamyz», - deıdi Kertaev.
Basty rólderdi Leılo Beknazar-Hanınga, Shárip Serik, Janel Maqajan, Oljas Toǵymbet, Aızada Satybaldıeva, Zırýza Tasmaǵambetova men Nursultan Esjan somdaıdy.
Kartınanyń rejısseri - Sanjar Omarov. «Habar» agenttiginiń tapsyrysymen túsirilgen telehıkaıa 14 qarashadan bastap seısenbi men juma aralyǵynda saǵat 21:30-da kórsetiledi.
Aıta keteıik, jańa týynda 14 qarashadan bastap «Habar» telearnasynda kórsetiletin bolady.
