Astanada «Ana tili» olımpıadasynyń jeńimpazdary anyqtaldy: 14 oqýshyǵa JOO granty berildi
ASTANA. KAZINFORM — Búgin elorda tórinde elimizdiń eń bilimdi ári til janashyry sanalatyn mektep oqýshylary marapattaldy. Ekinshi jyl qatarynan uıymdastyrylǵan «Ana tili» respýblıkalyq zııatkerlik olımpıadasy óz máresine jetip, eń úzdik 14 túlekke otandyq jetekshi joǵary oqý oryndarynyń bilim granttary tabystaldy.
Bıylǵy dodaǵa elimizdiń 20 óńirinen 2000-nan astam 9–11 (12) synyp oqýshylary qatysty. Іrikteýden súrinbeı ótken 64 komanda, ıaǵnı 200-ge jýyq oqýshy respýblıkalyq kezeńde baq synady.
Jobanyń basty ereksheligi — qazaq tilin tek ádebıet emes, jaratylystaný, ǵylym men tehnologııa tili retinde nasıhattaý.
— Bul jastar — qazaq tiliniń erteńgi jarqyn kórinisi. Bizdiń maqsatymyz — memlekettik tildiń bolashaq mamandardyń qalyptasýyna kómektesetin myqty zııatkerlik negiz ekenin kórsetý, — dep atap ótti Halyqaralyq «Qazaq tili» qoǵamynyń prezıdenti Raýan Kenjehanuly.
Uıymdastyrýshylardyń biri, «Bilim-Innovatsııa» HQQ vıtse-prezıdenti Qýat Qojahmetovtiń aıtýynsha, bıylǵy jarys komandalyq formatta ótken.
— Bul — toptyq olımpıada, sondyqtan munda jeke bilimmen qatar, ujymdyq jaýapkershilik te synǵa tústi. Saltanatty sharanyń eń tolqynysty sáti 11 synyp túlekterine joǵary oqý oryndarynyń granttaryn tabystaý boldy. Abaı atyndaǵy QazUPÝ, Qazaq ulttyq qyzdar pedagogıkalyq ýnıversıteti, SDÝ, Coventry University Kazakhstan jáne Narhoz sııaqty jetekshi oqý oryndary barlyǵy 14 bilim grantyn usyndy, — dep tolyqtyrdy uıymdastyrýshy.
Saltanatty sharanyń eń mańyzdy sáti — marapattaý rásimi boldy. Olımpıadanyń Bas júldesin Túrkistan oblysy, Arys qalasyndaǵy Abaı atyndaǵy «Bilim-Innovatsııa» lıtseıiniń «Úsh arys» komandasy ıelendi.
9-synyp oqýshysy, jeńimpaz komanda múshesi Úsenbaı Qajyhan óz áserimen bólisti.
— Biz bul dodaǵa tek tájirıbe jınaý úshin emes, ana tilimizdi damytýǵa úles qosý úshin keldik. Olımpıada barysynda taım-menedjment, kommýnıkatsııa jáne jaýapkershilik alý qabiletterimiz shyńdaldy. «Úsh arys» komandasy bolyp jaqsy daıyndyqpen kelgendikten, nátıje de kóńil qýantady. Bul — bizdiń alǵashqy qatysýymyz, biraq sońǵysy emes, — dedi jas jeńimpaz.
Aıta keteıik, buǵan deıin Eýropada turatyn qazaq balalaryna ana tilin tegin úıretip júrgen astanalyq ustaz jaıly jazǵan edik.