Astanada ÁMSQ qarjysyn jymqyrǵan jeke klınıka basshysy 5 jylǵa sottaldy
ASTANA. KAZINFORM — Astanadaǵy jeke klınıkada medıtsınalyq qyzmetter úshin jalǵan esepteýler anyqtaldy.
Astanada azamattardy medıtsınalyq uıymǵa tirkeý týraly málimetterdi qoldan jasaý arqyly bıýdjet qarajatyn jymqyrý isi boıynsha sot úkimi shyqty.
Tergep-tekserýdi QMA Astana qalasy boıynsha departamenti júrgizdi.
— «Forte Clinic (Tumar)» JShS jeke klınıkasynyń basshysy Áleýmettik medıtsınalyq saqtandyrý qorynan negizsiz qarjy alý maqsatynda emhanaǵa tirkelgen azamattar sanyn jasandy túrde kóbeıtý shemasyn uıymdastyrǵan.
Bul shemany júzege asyrý úshin ol «Densaýlyq saqtaýdy damytýdyń ulttyq ǵylymı ortalyǵy» ShJQ RMK qyzmetkerin tartqan. Ol qyzmettik qoljetimdiligin paıdalanyp, jalǵan ótinimderdi zańsyz maquldap otyrǵan.
Nátıjesinde qoldanystaǵy erejeler boıynsha mundaı tásil tek jekelegen sanattaǵy azamattarǵa ǵana qoldanylatynyna qaramastan, 15 myńnan astam adam jazbasha ótinishter negizinde emhanaǵa tirkelgen, — delingen QMA habarlamasynda.
Tekserý barysynda basqa óńirlerdiń turǵyndaryn, zańdy ókilderiniń qujattarynsyz kámeletke tolmaǵandardy, sondaı-aq elden tys jerge ketken azamattardy tirkeý faktileri anyqtaldy.
Sonymen qatar klınıka basshysy «Damu Med» aqparattyq júıesindegi medıtsına qyzmetkerleriniń akkaýnttaryn ákimshilik ókilderiniń telefon nómirlerine baılanystyryp, olardyń eseptik jazbalaryn baqylaýǵa alǵan.
Osy qoljetimdilikti paıdalana otyryp, zańsyz tirkelgen azamattarǵa medıtsınalyq qyzmetter kórsetilgeni týraly jalǵan málimetter engizip, Qordan qarjy aýdarýǵa negiz qalyptastyrǵan.
Saldarynan memleketke keltirilgen zalal 79 mln teńgeden asty.
Sot úkimimen klınıka basshysy 5 jylǵa, al Densaýlyq saqtaýdy damytý ortalyǵynyń qyzmetkeri 3 jylǵa bas bostandyǵynan aıyryldy.
Keltirilgen zalal tolyq kólemde óteldi.
Úkim zańdy kúshine endi.
Aıta ketelik Atyraýda hırýrg patsıentterden 8 mln teńgeden astam qarajatty zańsyz alǵan degen kúdikke ilingen edi.
