Astanada Ámire Qashaýbaev atyndaǵy dástúrli oryndaýshylardyń VIII respýblıkalyq konkýrsy ótedi

dep habarlady QR Mádenıet mınıstrliginiń baspasóz qyzmeti.

Ámire Qashaýbaev atyndaǵy dástúrli oryndaýshylardyń VIII Respýblıkalyq konkýrsy elimizdegi dástúrli ánderdi nasıhattaýǵa arnalǵan jáne uıymdastyrýy, qoıylymy jaǵynan eleýli mádenı shara bolyp esepteledi. Jas daryndy oryndaýshylar qazirgi kezde dástúrli án aıtýǵa úlken kóńil aýdarýda jáne osy óner túriniń bıik shyńyna shyǵam deýshiler de az emes. Sondyqtan jyl saıyn Ámire Qashaýbaev atyndaǵy dástúrli oryndaýshylar konkýrsy kóptegen talant ıelerin jınaıdy. Baıqaý nátıjelerinen keıin jas ánshilerdiń sheberlik deńgeıi kóterilip, Otandyq sahnadan óz ornyn tapqandar da az emes.

Konkýrsqa elimizdiń túkpir-túkpirinen 16-dan 35 jasqa deıingi jas ánshiler jınalǵan. Qatysýshylar halyq ánshileri men kompozıtorlarynyń ánderin oryndaýy tıis, sondaı-aq Ámireniń óziniń ánderin, qazirgi kompozıtorlardyń shyǵarmalaryn dombyra, qyl qobyzben taǵy da basqa qazaq aspaptarymen súıemeldep oryndaýy qajet. Ereje boıynsha qatysýshy konkýrstyń ár kezeńinde tórtten asa án aıtýy kerek. Jalpy konkýrs úsh kezeńnen turady.

Ámire Qashaýbaev - elimizdiń mádenı jáne tarıhı bolmysyndaǵy iri tulǵa ekenine kúmán joq. Zamandastary onyń erekshe talantymen qatar eshkimge uqsamas akterlik qasıeti jáne de vokaldyq sheberligin atap ótken. Halyq ánderin oryndaý Ámire Qashaýbaevqa jaratylysymen tabıǵattan berilgen syılyq syndy. Onyń oryndaýyndaǵy «Qyzyl bıdaı», «Úsh dos», «Jonyp aldy», «Ardaq», «Kelinshek», «Qanapııa», «Qorlan» ánderi qazaq eliniń rýhanı baılyǵy mol jáne ónerli meken ekendigin aıqyn kórsetedi. Ámire shabyttanǵanda «Jalǵyz arsha», «Aǵash aıaq» «Balqadısha», «Dýdaraı» ánderimen el-jurtyn tamsandyrǵan.

Eýropaǵa Qazaq ánderin pash etkender qatarynda Ámire Qashaýbaev ta bar. Ol alǵashqy bolyp ata-babamyzdan kele jatqan mura - halyq ánderin Batys sahnalarynda oryndaǵan. Máskeý, Parıj, Maıyndaǵy-Frankfýrt qalalarynda jınalǵan óner súıer qaýym Ámire arqyly qazaq dalasynyń qýanyshy men qaıǵysyn, ómiri men bolmysyn, tabıǵatyn, saltyn sezingen. Eýropa qazaq balasynyń daýysy men talantyna bas ıip, Uly dalany jańa qyrynan tanyǵan.

Atalmysh mádenı sharanyń basty baǵyty - daryndy jastardyń sheberligin ushtaý, qazaq halqynyń ánderin, shyǵarmashylyǵyn nasıhattaý, Uly dalanyń ónerli tulǵasy Ámire Qashaýbaevtyń esimin ardaqtaý, sonymen qatar konkýrs ósip kele jatqan jas býynnyń rýhanı jan-dúnıesin tárbıeleýdi maqsat tutady.