Astanada Ámire Qashaýbaev atyndaǵy dástúrli oryndaýshylardyń VІІІ respýblıkalyq konkýrsy bastaldy

Dástúrli oryndaýshylardyń óner báıgesi 20-22 sáýir aralyǵynda jalǵasady.

Uıymdastyrýshylardyń atap ótkenindeı, Á.Qashaýbaev atyndaǵy dástúrli oryndaýshylardyń Respýblıkalyq konkýrsy elimizdegi dástúrli ánderdi nasıhattaýǵa arnalǵan jáne uıymdastyrýy, qoıylymy jaǵynan aldyńǵy qatarda júretin birden bir mádenı shara bolyp esepteledi.

«Mádenıet mınıstrligi jylyna shamamen 30 baıqaý uıymdastyrady, alaıda Ámire Qashaýbaev atyndaǵy dátúrli oryndaýshylar konkýrsy olardyń arasynda erekshe orny alady jáne ylǵı joǵary turady. Sebebi Á.Qashaýbaev atyndaǵy baıqaýdyń tarıhy keńes ýaqytynan bastalady. Osy jyldar boıy baıqaý ondaǵan daryndardyń atyn shyǵardy», - dedi QR mádenıet mınıstrliginiń ókili Roza Káribjanova baıqaýdyń alǵashqy kúnin asha otyryp.

Bıylǵy jyly konkýrstyń 3 júldeli orny úshin elimizdiń túpkir-túpkirinen kelgen 16-dan 35 jasqa deıingi 37 oryndaýshy baq talastyrady. Qatysýshylar halyq ánshileri men kompozıtorlarynyń ánderin oryndaýy tıis, sondaı-aq dombyra, qylqobyz taǵy da basqa qazaq ulttyq aspaptarynyń súıemeldeýimen Á.Qashaýbaevtyń ánderin, qazirgi kompozıtorlardyń shyǵarmalaryn oryndaýy tıis. Jalpy konkýrs úsh kezeńnen turady.

Ámire Qashaýbaev elimizdiń mádenı jáne tarıhı bolmysyndaǵy iri tulǵa. Onyń oryndaýyndaǵy «Qyzyl bıdaı», «Úsh dos», «Jonyp aldy», «Ardaq», «Kelinshek», Balqadısha, «Dýdaraı» ánderi qazaq eliniń rýhanı baılyǵy mol jáne ónerli meken ekendigin aıqyn kórsetedi. Sondaı-aq Á.Qashaýbaev Eýropaǵa qazaq ánderin alǵash pash etkender qatarynan tabylady. Máskeý, Parıj, Frankfýrt-na-Maıne qalalarynda ónersúıer qaýym Ámire arqyly qazaq halqynyń bolmysyn tanyǵan.

Mádenı is-shara Qazaqstan Respýblıkasynyń Mádenıet mınıstrligi men «Qazaq áýenderi» AQ-nyń muryndyq bolýymen ótýde.