Astanada amerıkalyq GE HealthCare Academy oqý ortalyǵy ashyldy
Prezıdent Qasym-Jomart Toqaevtyń qyrkúıektegi AQSh-qa jasaǵan sapary kezinde GE HealthCare kompanııasymen negizdemelik kelisimge qol qoıylǵan bolatyn. Sonyń aıasynda búgin Astana medıtsına ýnıversıtetinde GE HealthCare Academy-diń eldegi alǵashqy oqý ortalyǵy ashyldy, dep habarlaıdy Kazinform.
Oqý ortalyǵynyń baǵdarlamasyna akýsherlik, gınekologııa, reprodýktıvti medıtsına, kardıologııa salasyndaǵy ýltradybystyq dıagnostıka taqyrybyndaǵy kýrstar kirip otyr.
Ortalyqta jylyna 150 adam kýrstan ótedi.
Ortalyqtyń ashylý saltanatyna Densaýlyq saqtaý mınıstri Ajar Ǵınııat qatysty.
«Kompanııamen kezdesken kezde jańa zaýyttar ashyp qana qoımaı, álemdegi tanymal kompanııalardyń bizdiń mamandary oqytqany da mańyzdy ekenin aıtqanbyz. Ol zaýyttarǵa ózimizdiń kompanııalar, óz ınjenerlerimiz qyzmet kórsetkeni kerek. Sondyqtan bizde damý ınstıtýttary men trenıng ortalyqtary ashylsa degen tilegimiz bolǵan», - dedi mınıstr.
Oqý ortalyǵynda Astana medıtsınalyq ýnıversıteti men GE HealthCare mamandary sabaq júrgizedi.
Keıbir dárister men sheberlik sabaǵyna qazaqstandyq jáne sheteldik sarapshylar tartylmaq.
AQSh-tyń Qazaqstandaǵy Tótenshe jáne ókiletti elshisi Denıel Rozenblıým mundaı deńgeıdegi áriptestik eki jaqqa da tıimdi ekenin aıtady.
«Jańa ortalyq eki jaq úshin de jaqsy múmkindik. Óıtkeni Astana medıtsınalyq ýnıversıtetinde GE HealthCare sarapshylarynyń qoldaýymen jańa tehnologııalar tanystyrylady. Onyń paıdasy medıtsına salasyn ıgerip júrgen stýdentter men dárigerlerge ǵana emes, solardan em alatyn qarapaıym turǵyndarǵa da tıedi. Sondyqtan mundaı áriptestik óte mańyzdy», - dedi AQSh elshisi.
