Astanada Amerıkadan jetkizilgen emen aǵashtary ósip jatyr - Djordj Krol
ALMATY. QazAqparat - Halyqaralyq Jer kúni aıasynda Astanada Qazaqstandaǵy AQSh elshiligi men Almaty aýdanynyń ákimdigi aǵash otyrǵyzý rásimin ótkizdi, dep habarlaıdy QazAqparat tilshisi.
Ákimdik pen elshiliktiń birlesken bastamasymen elorda kósheleriniń birine 15 túp qaraǵaı otyrǵyzyldy.
«Ózderińizge belgili, jyl saıyn sáýir aıynyń sońynda Halyqaralyq Jer kúni atalyp ótedi. Sondaı-aq, Amerıkada aýa sapasy aptalyǵy ótedi. Óıtkeni AQSh-tyń birneshe qalasynda qorshaǵan orta men aýanyń lastanýy máseleleri bar. Aǵashtar - aýany tazalaýdyń taptyrmas quraly, sondyqtan amerıkalyqtar kóbirek aǵash otyrǵyzýǵa tyrysady. Qazaqstan Prezıdenti de arnaıy baǵdarlama quryp, Astananyń aınalasyna mıllıondaǵan aǵash otyrǵyzdy. Bul naǵyz tamasha bastama», - dedi Amerıka Qurama Shtattarynyń Qazaqstandaǵy elshisi Djordj Krol.
Djordj Krol jyl saıyn elshilik qyzmetkerleriniń aǵash otyrǵyzýǵa belsene qatysatynyn, AQSh elshiligi aýmaǵynda 400-ge jýyq aǵash bar ekenin atap ótti. Olardyń arasynda qaraǵaı, qaıyń, tipti Soltústik Dakota shtatynan jetkizilgen emender de bar.
«Byltyr EKSPO-2017 kórmesine AQSh-tan prezıdenttik delegatsııa keldi. Sonda AQSh Kongresiniń depýtaty Soltústik Dakota shtatynan 30-40 túp emen kóshetin ákeldi. Bul kóshetterdi elshilikke jáne jaqynda ashylatyn Astananyń botanıkalyq baǵyna otyrǵyzdyq. Soltústik Dakota men Astananyń klımattary uqsas. Sondyqtan, bizdiń kóshetterimiz bolashaqta alyp aǵashqa aınalady dep úmittenemiz», - dedi ol.
Sondaı-aq, Djordj Krol Astanaǵa arnaıy aýysyp kelgen AQSh Aýyl sharýashylyǵy mınıstrligi ókilin tanystyrdy.
«Qańtar aıynda Qazaqstan Prezıdenti Nursultan Nazarbaev AQSh-qa saparlap, Donald Tramppen kezdesken bolatyn. Olar AQSh pen Qazaqstan arasyndaǵy klımat, aýyl sharýashylyǵy boıynsha qarym-qatynasty damytýǵa ýaǵdalasty. Reıchel - agronomııa men mal sharýashylyǵy boıynsha sarapshy, ol Qazaqstannyń barlyq óńirlerin aralap shyqty», - dedi Dj. Krol.
