Astanada alyp labırınt salynady
ASTANA. QazAqparat - Muzdan jasalatyn alyp labırınt EXPO aımaǵynda ornalasady. Bul aqparatty ulttyq kompanııanyń ókilderi de rastady. Alaıda atalǵan joba jergilikti bıliktiń esebinen salynady, dep xabarlaıdy QazAqparat tilshisi.
Aıta ketken jón, bıyl Astanadaǵy eń úlken muz qalashyǵy EXPO aımaǵynda ornalaspaq. Qalanyń bas shyrshasy da osy jerde qoıylady. Shyrshanyń aldynda saxna, al eki jaǵynda úlkenderge arnalǵan eki syrǵanaý tóbeshigi bolady. Bıiktigi bes metr, al uzyndyǵy 40 metr bolsa, balalardyń tóbeshikteri 14 metrge deıin sozylady. Bıiktigi 2,5 metrden aspaıdy. Budan bólek, san alýan mýltıplıkatsııalyq personajdardyń músinderi quıylady. Álemge áıgili Hrýstal qamaldyń (Crystal Palace) kóshirmesi de jasalady. Onyń túpnusqasy 1851 jylǵy Búkilálemdik kórme aıasynda Londonnyń Gaıd-saıajaıynda salynǵan bolatyn.
"Al amfıteatrǵa jaqyn jerde muzdan labırınt jasalady. Ol bólek turatyn shyǵar. Bul jumysqa Astana ákimdigi jaýapty. Sebebi bıyl qalanyń bas shyrshasy da, muz qalashyǵy da osy jerde ornalasady", - deıdi ulttyq kompanııanyń ókilderi.
Eskızge sáıkes, labırınt tosqaýyldarynyń bıiktigi 1,2-1,4 metr bolady. Al aýdany 40/40 metrdi alyp turady. Qaq ortasynda EXPO-nyń logotıpi bolady. Muzdyń arasyna dıodty shamdar da ornatylady.
Aıta keteıik, búgin EXPO aımaǵynda jebe pishindes muz aıdyny ashylǵan bolatyn. Onyń astyna tońazytqysh quraldary ornatyldy. Sóıtip, jyly aýa-raıyna qaramastan, ashyq aspan astyndaǵy muz aıdynyn ashýǵa múmkindik týdy. Atalǵan jobaǵa 300 mln teńge jumsaldy. Kirý bıletteri de arzan emes.
