Astanada alyp kıiz úı salynyp jatyr

ASTANA. QazAqparat - Atalǵan nysan «Astana Art Fest» xalyqaralyq óner festıvali aıasynda salynýda. Ol jerde jerge jatyp, tóbeden fılm kórýge bolady, dep xabarlaıdy QazAqparat tilshisi.

Alyp kıiz úıdiń irgesi poddondardan kóterilip jatyr. Qurylysta ondaı poddondarmen kirpishterdi túıip, joǵarǵy qabattarǵa jetkizedi. Al «Astana Art Fest» festıvaliniń qatysýshylary qurylys salasynyń osy bir materıalyn kádege jaratyp, proektsııalyq kınoteatrdy qurastyryp shyǵýǵa bel býdy.

 

Jospar boıynsha, alyp kıiz úıdiń tóbesi jabylǵannan keıin tóbege úlken proektsııalyq ekran ornatylady. Al pavılonnyń ishine kirgen adamdar jerge jatyp, fılm kóre alady.

«Konstrýktsııanyń jalpy salmaǵy 40 tonnadan asady. Oǵan shamamen 1700 poddon ketedi. Negizi, 6 shildege deıin bitirý kerek. Qazir biz qańqasyn kóteremiz de, artymyzdan basqa bir kompanııa kelip, texnıkalyq qural-jabdyqtardy ornatady. Astana kúnine deıin úlgeretin shyǵar», - deıdi qurylysshylar.

Aıta keteıik, jańa nysan «Nurly jol» býlvary boıymen «Kerýen» oıyn-saýyq saýda kesheniniń janynda salynyp jatyr.