Astanada alty mektepke tarıhı tulǵalardyń esimi berildi

ASTANA. QazAqparat – Elordadaǵy alty mektepke uly tulǵalardyń esimi berildi. Bul týraly Astana qalasy tilderdi damytý jáne arhıv isi basqarmasynyń basshysy Sáken Esirkep málim etti, dep habarlaıdy QazAqparat tilshisi.

Atap aıtqanda, elorda ákimdiginiń 12 maýsymdaǵy №511-1116 qaýlysyna sáıkes kelesi mektepterge uly tulǵalardyń esimi berildi:

№1 mektep-lıtseıge Keńes Odaǵynyń batyry, avıatsııa general-maıory Talǵat Bıgeldınovtiń esimi berildi. Ol nebári 23 jasynda Keńes Odaǵynyń eki márte batyry atanǵan. Soǵystan keıingi jyldary da otandyq áskerı-áýe kúshterinde túrli basshylyq laýazymdarda abyroımen qyzmet etti.

№70 mektep-lıtseıge kórnekti memleket jáne qoǵam qaıratkeri Temirbek Júrgenovtiń esimi berildi. Ol Halyq aǵartý komıssary bolyp, ulttyq mádenıetimizdi jańǵyrtýǵa, jastardyń bilim alýyna kóp jaǵdaı jasady. Qazaq jeriniń shekarasyn belgileý isine belsene aralasyp, el múddesi jolynda kóp qyzmet etti.

№92 mektep-lıtseıge geologııa-mıneralogııa ǵylymdarynyń doktory, akademık, QR Ulttyq ǵylym akademııasynyń alǵashqy quryltaıshylarynyń biri, Qazaqstannyń eńbek sińirgen ǵylym qaıratkeri Aqjan Ál-Mashanıdiń aty berildi. Ol geologııa, mıneralogııa ǵylymdarymen shuǵyldanýmen qatar, uly ustaz, ǵalym Ábý Nasyr ál-Farabıdi zerttep, kóp ǵylymı derek qaldyrǵa.

№65 mektep-gımnazııaǵa Alash qozǵalysynyń beldi múshesi, qazaq poezııasynyń kórnekti ókili Maǵjan Jumabaevtyń esimi berildi. Ol – óziniń otty jyrlarymen jáne naqty isterimen halyqtyń rýhyn oıatýǵa, azattyq jolyndaǵy arman-murattaryn iske asyrýǵa jan-tánimen qyzmet etip, aıaýsyz rejımniń qurbanyna aınalǵan tulǵa.

№88 mektep-lıtseıge Qazaqstannyń halyq jazýshysy, belgili aqyn Qadyr Myrza Áliniń esimi berildi. Ol – 50-den astam poezııalyq jınaqtyń avtory. Kóp jyl boıy balalar ádebıetiniń damýyna úles qosqan. Álemdik klassıkterdiń shyǵarmalaryn qazaq tiline aýdarsa, óziniń biraz toptamalary men tańdaýly óleńderi aǵylshyn, frantsýz, nemis, polıak, bolgar, venger, fın tilderine aýdaryldy.

№1 óner mektebine qazaqtyń áıgili kúıshi-kompozıtory, dombyrashy, shertpe kúı mektebiniń negizin qalaýshylardyń biri, halyq kúı óneriniń klassıgi Táttimbet Qazanǵapulynyń esimi berildi. Táttimbettiń bizge 40-tan astam kúıi jetken. Týyndylary qazaq kúı óneriniń altyn qazynasy sanalady.