Astanada alty aıda 2308 alaıaqtyq qylmys tirkeldi

Bul týraly astana.kz saıtyna qalalyq Іshki ister departamentinen habarlady.

Vedomstvonyń málimetterine qaraǵanda, osy taqilettes qylmystardan zardap shekken astanalyqtar quqyq qorǵaý organdaryna jıi shaǵymdanady. Alaıaqtyq faktisiniń artýyna negizinen, alaıaqtarmen sóz baılasyp, kúmándi kelisimder jasasqan kóptegen azamattardyń zańdardy bilmeýi de sebep. Keıde jábirlenýshiler tıimdi sharttarmen jáne tómendetilgen baǵamen qandaı da bolmasyn taýar nemese qyzmetti alamyn dep alaıaqtarǵa urynady.

Departamenttiń habarlaýynsha, jalǵan qyzmetter kórsetemin dep ózgeniń aqshasyn ıemdený sekildi alaıaqtyq túri jıi (kem degende, 50%) kezdesedi. Ádette, bul adamdar jyljymaıtyn múlik nysandaryn, qymbat kólikterdi, tıimdi paıyzben nesıe alýdy resimdeý boıynsha joǵary laýazymdy sheneýnikterdiń «qamqorlyǵyna» ıe ekenderin aıtady.

Aıta keteıik, jyljymaıtyn múlikti zańsyz ıemdený jáne ony odan ári iri somaǵa satýmen baılanysty qylmystar qoǵamda keń etek jaıǵan. Osyndaı «kelisimderdiń» nátıjesinde jábirlenýshiler jer sıpap qalady.

«Budan basqa, Astanada telefon arqyly aldaý jaǵdaılary da jıi oryn alady. Qaskóıler telefon soǵyp, ózderin polıtsııa qyzmetkerimin dep tanystyrady jáne qylmys jasaǵandary úshin týǵan-týysyn ustap alǵandaryn (esirtki saqtaý, jol-kólik oqıǵasy jaıynda) habarlaıdy. Osylaısha, ony qylmystyq jaýapkershilikten bosatý úshin aqsha bopsalaıdy. Al aqshany alǵan soń izderin sýytady», delingen aqparatta.

«Elorda azamattaryna beıtanys adamdarmen kelisim jasaspas buryn, saq bolý kerek. Alaıaqtar usynǵan aqparatqa ǵana júginbeı, menshik ıesi men satýshylardy muqııat tekserý qajet. Adamdardyń kóbi jyljymaıtyn múliktiń naryqtaǵy baǵadan arzan satylýyn bilgende, esteri adasyp, kúmándi kelisimderge oılanbastan barady. Bul jaǵdaıda adam psıhologııasynyń álsiz jaqtary men qylmyskerlerdiń onyń osal jerlerin paıdalana biletini baıqalady», - dep eskertedi ІІD.