Astanada alty jasar balany júk kóligi qaǵyp, mert qyldy

ASTANA. KAZINFORM – Astanada Ál-Farabı kóshesinde ornalasqan turǵyn úıdiń aýlasynda 6 jastaǵy balany júk kóligi qaǵyp ketti.

Kámeletke tolmaǵan balanyń ólimine ákelgen jol-kólik oqıǵasy boıynsha qylmystyq is qozǵaldy.

- Aldyn ala málimetter boıynsha, 38 jastaǵy Dongfeng markili kólik júrgizýshisi Ál-Farabı kóshesindegi turǵyn úıdiń aýlasynda qaýipsiz ekenine kóz jetkizbesten manver jasap, 6 jastaǵy velosıped mingen balany qaǵyp ketken, - dep habarlady Astana qalalyq polıtsııa departamentinen.

Oqıǵa saldarynan bala aýrýhanaǵa jetkizilip, onda ol alǵan jaraqattarynan qaıtys boldy.

Osyǵan deıin elordada Beısekbaev kóshesimen kele jatqan júk kóliginiń júrgizýshisi Kenesary kóshesiniń qıylysynda burylý kezinde, baǵdarshamda belgilengen jolaqtan joldy kesip ótip bara jatqan kámeletke tolmaǵan jaıaý júrginshini qaǵyp ketkeni týraly jazdyq.

Jaıaý júrginshi baǵdarshamnyń ruqsat etilgen belgisi janǵan kezde ótip bara jatqan. Alǵan jaraqatynyń saldarynan o oqıǵa ornynda kóz jumdy.