Astanada alpysqa jýyq qalyńdyq kelinder sherýine qatysty (FOTO)
ASTANA. QazAqparat - Búgin Astanada Elorda kúnine oraı 60-qa jýyq qalyńdyq aq kóılekterin kıip, «kelinder sherýine» qatysty. Kúni boıy lımýzındermen jáne ústi ashyq eki qabatty avtobýspen qalany aralaǵan olar keshke qaraı «Astana Opera» teatrynyń aldyna jınalyp, saltanatty sherýdiń sheshýshi sátine qatysty.
«Bul shara eń aldymen otbasylyq qundylyqtardy nasıhattaıdy. Bizdiń oıymyzsha úılený toıy degen ár adamnyń ómirinde tek bir ret qana bolý kerek. Kelinder sherýine barlyǵy 58 qalyńdyq qatysýda. Buǵan kez kelgn qalaýshy qatysa alady. Olardyń jartysyna jýyǵy otbasyn qurǵan áıelder, al qalǵan jartysy endi kelin bolýǵa daıyndalyp júrgen qyzdar. Sharanyń eń úlken qatysýshysy 42 jasta. Olar ózderiniń ómirindegi eń ǵajaıyp sátterdi esine alǵylary keledi. Sondyqtan biz olarǵa qolymyzdan kelgenniń barlyǵyn jasaýdamyz», - deıdi sharany uıymdastyrýshy Qanat Aıaǵanov.
Uıymdastyrýshylardyń aıtýynsha búginde dál osy kezeń úılený toılarynyń merzimine aınalǵan. Elordadaǵy iri úılený toıy salondarynyń birin basqaryp otyrǵan Aıgerim Ábenova astanalyq qalyńdyqtardyń qazir qandaı toı kóılegin qalaıtynyn aıtyp berdi.
«Sán úlgisi sát saıyn ózgerip otyrady. Sondyqtan bul úrdis úılený toıyna arnalǵan kóılekterdi de aınalyp ótpeıdi. Qazirgi qalyńdyqtar kóbine ashyq-shashyq emes, meılinshe sypaıy, jabyq kóılekterdi tańdaıdy. Sonymen qatar, búginde dástúrli aq tústi aıvorı túsi yǵystyryp barady. Sondaı-aq qazir toı kóılegin jalǵa alýda azaıǵan, kóbi satyp alady. Negizinen jaqsy kóılekterdiń baǵasy 150 myń teńgeden bastalady», - deıdi ol.
