Astanada Almaty men Aqtóbe oblysy taýar óndirýshileriniń jármeńkesi ótti
ASTANA. QazAqparat - Astanada óńirlik aýyl sharýashylyǵy taýaryn óndirýshilerdiń kezekti jármeńkesi ótti, dep habarlaıdy Astana ákimdiginiń baspasóz qyzmeti.
Bul joly Elorda turǵyndary men qonaqtaryna Aqtóbe men Almaty oblystarynyń sharýalary keń kólemde ónim túrlerin jetkizdi.
Almaty oblysynyń úsh qalasy men 19 aýdan ortalyǵynan kelgen sharýalar 1 mlrd teńgeniń 2800 tonna ónimin usyndy.
«EKSPO-2017 kórmesi kezinde biz Astanaǵa 19 myń tonna ónim jetkizýdi josparlap otyrmyz. Bizge kún saıyn 7 myń ónim jetkizetin dıstrıbıýtorlyq kompanııalar bar. Al jyljymaly jármeńkelerde sharýalar 12 myń tonna ónim ákeledi. Mundaı sharalar oblys kásipkerleri úshin asa tıimdi. Ystyq aýa-raıyna qaramastan óndirýshiler tyrysyp baǵýda. Bizde refrıjerator fýralar bar, barlyq ónimder sol jerde saqtalady. Maýsym barysynda biz jármeńkege úsh ret qatysýdy josparlap otyrmyz», - deıdi Almaty oblysy ákiminiń orynbasary Serikjan Beskempirov.
Almaty oblysynyń ónimderine tutynýshylar tarapynan suranys joǵary ekeni baıqalady. Astanalyqtar ásirese kelisi 180-nen 210 teńge aralyǵyndaǵy jańa pisken kartopty kóptep alýda. Sondaı-aq, qulpynaı, shıe, balyq jáne sút ónimderi de jaqsy ótip jatqanyn aıtady Almaty oblysy ákimdiginiń ókilderi.
Sonymen qatar Astananyń aýylsharýashylyǵy basqarmasy qoıylǵan ónimderdiń baǵasyna monıtorıng júrgizip, sanıtarlyq talapty da qadaǵalaýda.
«Baǵa saıasatyn qadaǵalaýdan tys, munda tań atpastan veterınar dárigerler jumys jasaýda. Olar arnaıy zerthanalarda synama júrgizip, qaýipti zattardyń bar-joǵyn anyqtaıdy. Sonymen qatar munda tutynýshylardyń quqyǵyn qorǵaý departamenti, qalalyq ákimdiktiń ókilderi de jumys istep jatyr, olar qujattardy tekseredi. Saýda sórelerine taýarlar tolyq tekseristen ótkennen soń ǵana qoıylady», - deıdi Astana qalasynyń aýyl sharýashylyǵy basqarmasy azyq-túlik ónimderi qaýipsizdigin qamtamasyz etý bóliminiń basshysy Rızagúl Músilimova.
