Astanada Almaty kóshesiniń bir bóligi jyl sońyna deıin jabylady
ASTANA. KAZINFORM – Astanada kólik tonneliniń qurylysyna baılanysty Almaty kóshesiniń bir bóligi birneshe aıǵa jabylady.
Qala ákimdiginiń málimetinshe, «Almaty kóshesi boıymen Máńgilik El dańǵylynan Saýran kóshesine deıingi ýchaskede kólik tonnelin salý» jobasy aıasynda 20 maýsymnan bastap jyl sońyna deıin Almaty kóshesiniń Aqmeshit kóshesinen Túrkistan kóshesine deıingi aralyǵy tolyq jabylady.
Sonymen qatar Almaty kóshesiniń Aqmeshit jáne Túrkistan kóshelerimen qıylystary ashyq kúıinde qalady.
«Júrgizýshiler men jaıaý júrginshilerden marshrýttaryn aldyn ala josparlaýdy suraımyz. Qaýipsizdikti qamtamasyz etý jáne qolaısyzdyqtardy azaıtý maqsatynda ýaqytsha jol belgileri men baǵyttaýshy kórsetkishter ornatylady», – dep habarlady ákimdik.
Qala bıligi turǵyndardy qozǵalys syzbasyndaǵy ózgeristerdi eskerip, jol júrý baǵytyn aldyn ala josparlaýǵa shaqyrdy.
Almaty kóshesi boıyndaǵy kólik tonneli jobasy kólik aǵynyn ońtaılandyryp, jol keptelisin azaıtý maqsatynda júzege asyrylyp jatyr.
Aıta keteıik, Almatyda qoǵamdyq kólik qozǵalysyn jedeldetý úshin arnaıy jolaq ashylady.
