Astanada Almaty kóshesindegi tonnel qurylysy qashan aıaqtalady
ASTANA. KAZINFORM — Elordada Almaty kóshesinde kólik tonneliniń qurylysy jalǵasyp jatyr. Atalǵan ýchaskede kólik qozǵalysyn 2027 jyldyń sońyna deıin ashý josparlanyp otyr. Bul týraly qalalyq Kólik jáne jol-kólik ınfraqurylymyn damytý basqarmasy málimdedi.
Kólik tonneli Máńgilik El dańǵylynan Saýran kóshesine deıingi aralyqty jalǵamaq.
Búginde aýmaqta ınjenerlik jelilerdi kóshirý, aýmaqty daıyndaý jáne burǵylanǵan qadalardy ornatý jumystary júrgizilip jatyr.
— Qazirgi ýaqytta nysanda qurylys jumystary qarqyndy júrgizilip jatyr. Bıyl jumystar kezeń-kezeńimen atqarylyp keledi. Búgingi tańda qubyr tóseý jáne transheıalardy qummen keri kómý boıynsha tehnologııalyq kezeńder aıaqtaldy, — dep habarlady basqarma.
Jobany iske asyrý nátıjesinde osy baǵyttaǵy kólik qozǵalysy jaqsarady. Atap aıtqanda, Aqmeshit jáne Túrkistan kóshelerindegi qıylystardy alyp tastaý josparlanǵan. Bul úzdiksiz kólik qozǵalysyn qamtamasyz etip, kóshe-jol jelisiniń ótkizý qabiletin arttyrýǵa múmkindik beredi.
Sonymen qatar, joba aıasynda jaıaý júrginshilerge arnalǵan ınfraqurylymdy jaqsartý jáne aýmaqty kógaldandyrýǵa qosymsha múmkindikter jasaý kózdelgen.
Aıta keteıik, buǵan deıin tozyǵy jetken kópirlerdi jóndeý boıynsha 5 jyldyq jańa baǵdarlama iske qosylatynyn jazǵanbyz.