Astanada «Al Jazeera Week in Kazakhstan» halyqaralyq jobasynyń ekinshi maýsymy bastaldy
ASTANA. KAZINFORM — «Al Jazeera Week Qazaqstanda» bilim berý jobasynyń ekinshi maýsymy QR Prezıdenti Teleradıokesheniniń qatysýymen Maqsut Narikbayev University janyndaǵy Halyqaralyq jýrnalıstıka mektebinde ashyldy.
Jobanyń ashylý saltanatyna QR Prezıdentiniń Teleradıokesheni dırektorynyń orynbasary Erkejan Kúntýǵan, Al Jazeera Media Institute dırektory Eman Al Amrı, MNU basqarma tóraǵasy Talǵat Nárikbaev, stýdentter, dáriskerler jáne qurmetti qonaqtar qatysty.
Jańa maýsym aıasynda Al Jazeera Media Network mamandary qazirgi jýrnalıstıkanyń ózekti máseleleri, álemdik aqparat keńistigindegi mańyzdy úderister, tsıfrlyq medıanyń damýy jáne mazmundy, jaýapty ári básekege qabiletti aqparattyq ortany qalyptastyrýdaǵy jańa býynnyń róli jóninde tájirıbe bólisip, pikir almasady.
Halyqaralyq bilim berý jobasy Qazaqstannyń medıa salasy ókilderi men Al Jazeera Media Network mamandary arasynda tájirıbe almasýǵa múmkindik beretin mańyzdy alańǵa aınaldy.
Joba 28 qyrkúıek pen 2 qazan aralyǵynda ótedi. Bes kúndik baǵdarlamada derekter jýrnalıstıkasy, tsıfrlyq storıtellıng, jýrnalıstik zertteý, mobıldi jýrnalıstıka, faktchekıng jáne aqparattyń shynaıylyǵyn anyqtaý, zamanaýı derekti jýrnalıstıka, sondaı-aq suhbat júrgizý ádistemesi sııaqty ózekti baǵyttardy qamtıtyn jeti bilim berý baǵdarlamasy usynylady.
Baǵdarlamaǵa 130-dan astam bakalavrıat stýdenti, medıasalada eńbek etip júrgen 100-ge jýyq maman, sondaı-aq magıstranttar, doktoranttar men professor-oqytýshylar quramy qatysady.
Teorııalyq jáne praktıkalyq sabaqtardan turatyn oqý baǵdarlamasy qorytyndysynda stýdentter ár baǵyt boıynsha kýrstyq jobalaryn ázirlep, qorǵaıdy. Oqý nátıjesinde qatysýshylar Al Jazeera Media Institute sertıfıkatyna ıe bolady.
Eske sala keteıik, 2023 jyly ashylǵan Halyqaralyq jýrnalıstıka mektebi — QR Prezıdentiniń Teleradıokesheni men Maqsut Narikbayev University-diń birlesken jobasy. Joba talantty jastardy qoldaýǵa, olardyń kásibı damýyna jaǵdaı jasaýǵa jáne qoǵam men memlekettiń qazirgi zamanǵy kommýnıkatsııalyq suranystaryna jaýap bere alatyn bolashaq jýrnalısterdiń kásibı kadrlar rezervin qalyptastyrýǵa baǵyttalǵan.
QR Prezıdentiniń Teleradıokesheni — medıakontentti óndirý men taratýdyń tolyq tsıklin júzege asyratyn, Qazaqstandaǵy eń iri medıa kompanııalardyń biri. Kompanııa quramyna qazaqstandyq kórermenge arnalǵan Jibek Joly telearnasy men attas radıo, Silk Way, Silk Way Cinema jáne Silk Way Prime halyqaralyq telearnalary, Kazinform halyqaralyq aqparat agenttigi, Derekti kıno ortalyǵy jáne TRKLAB tsıfrlyq medıa bólimi kiredi.
Al Jazeera telekompanııasy 1996 jyly Qatar ámiriniń jarlyǵymen quryldy. Búginde ol álemniń kóptegen eline arab jáne aǵylshyn tilderinde habar taratyp, shetelderde 50-den astam bıýrosy arqyly jumys isteıdi. Derekti fılmder men baǵdarlamalar Al Jazeera Documentary telearnasynda kórsetiledi.
Buǵan deıin byltyr jeltoqsan aıynda Qatar astanasy Doha qalasynda Qazaqstan Respýblıkasy Prezıdentiniń Teleradıokesheni basshylyǵy men álemdegi eń iri ári bedeldi medıakompanııalardyń biri — Al Jazeera Media Network ókilderiniń kezdesýi ótkenin jazǵanbyz.
