Astanada Álisher Naýaıǵa eskertkish ornatylady
ASTANA. QazAqparat - Búgin Qazaqstandaǵy Ózbekstan jylynyń ashylý saltanatynda QR Prezıdenti Nursultan Nazarbaev jańa eskertkishtiń boı kóteretinin jarııalady, dep habarlaıdy QazAqparat tilshisi.
«Qazaqstan men Ózbekstan arasyndaǵy baılanystardy nyǵaıtyp, rýxanı qarym-qatynasymyzdy nyǵaıtýymyz qajet. Kóp ǵasyrlyq dostyǵymyzdy kúsheıtýimiz kerek. Sol sebepti biz Astana qalasynda Álisher Naýaıǵa eskertkish ornatylady. Uly Abaıdyń eskertkishi de Tashkent qalasynda ashylǵan bolatyn», - dedi Memleket basshysy.
Aıta keteıik, Álisher Nızamaddın Mır Naýaı - túrki halqynyń uly aqyny, oıshyly, memleket qaıratkeri. Túrki-shaǵataı tilinde «hámsá» jyrlar tobyna enetin «Jaqsylardyń tańdanýy» (1483), «Farhad pen Shyryn», «Láıli men Májnún», «Jeti álem» (1484), «Eskendir dýaly» (1485) atty shyǵarmalaryn jazdy. 1488 - 1501 j. ol tarıhı-ómirbaıandyq («Ádjám patshalarynyń tarıhy», «Saıd Hasan Ardasherdiń ómiri», Páhlovan Muhammedtiń ómiri»), dıdaktıkalyq-fılosofııalyq («Qustar tili», «Kóńilderdiń súıgeni»), ádebı-teorııalyq («Óleń ólshemi»), lıngvıstıkalyq («Eki tildiń talasy»), áleýmettik-ekonomıkalyq («Vaqfııa»), dinı-ǵuryptyq («Paıǵambarlar men hakimderdiń tarıhy», «Musylmandyq nury», «Gaýharlar shoǵyry») týyndylaryn jazdy. Parsy tilinde 12 myń jol óleńin «Dıýan-fanı» degen atpen derbes jınaq etip qurastyrdy. «Bes qaırat» («Hámsát ýl-mýtahaırın») kitabyn ustazy Abdrahman Jámıge (1414 - 92) arnady. 15 ǵasyrda ómir súrgen 400 shaıyrdyń shyǵarmashylyǵynan málimet beretin «Ǵajaıyp májilister» («Madjolıs ýn-nafoıs») kitabyn shyǵarǵan.
