Astanada alıment tólemeı júrgen ákelerdiń qaryzy 300 mln. teńgeden asty
ASTANA. QazAqparat - Astana qalasy boıynsha alımenttik qaryzdyń jalpy somasy 300 mln. teńgeden asyp jyǵyldy. Bul týraly qalalyq prokýratýrada ótken brıfıng barysynda Astana qalasy prokýratýrasynyń tórtinshi basqarma prokýrory Azamat Kúreńkeı málimdedi.
Onyń aıtýynsha, sońǵy jyldary alımenttik ótemaqy talap etken qujattar qalalyq atqarý organdaryna kóptep túsýde. Munyń basty sebebi ishki kóshi-qon saldarynan bolyp otyrǵan kórinedi. Alıment tóleýi tıis azamattar jumys izdep Astanaǵa keledi, al olardyń artynan jańaǵyndaı qujattar da jetedi, deıdi maman.
«Turaqty jumys oryndary joq boryshkerlerdiń jalpy sany 8 myń adamnan asady. Al jalpy qaryzdyń somasy 28 874 balaǵa shaqqanda 303 mln. teńgeden asyp jyǵyldy», - dep atap ótti A.Kúreńkeı.
Onyń aıtýynsha, saraptama nátıjesinde boryshkerlerdiń jas shamasy 25-35 jas aralyǵynda ekeni anyqtaldy.
«Aıta keteıik, bıylǵy jyldyń 1 qańtarynan bastap alıment tólemegender úshin jaýapkershilik kúsheıdi. Eger alıment 3 aıdan astam ýaqyt boıy tólenbese, boryshkerdiń ústinen qylmystyq is qozǵalyp, ol 2 nemese odan da kóp jylǵa bas bostandyǵynan aıyrylýy múmkin», - dedi ol.
