Astanada alıment tólemegen áke 5 táýlikke qamaldy
ASTANA. QazAqparat -Astanada bir jyl boıy alıment tólemeı kelgen áke 5 táýlikke ákimshilik qamaý túrindegi jazaǵa tartyldy.
Bul týraly Astana qalalyq prokýratýrasynyń baspasóz qyzmetinen habarlandy.
«Astana qalasy Almaty aýdanynyń prokýratýrasyna A. Rahımjanovanyń aryzy kelip túsken bolatyn. Osyǵan oraı, J. Rahımjanovtan kámelet jasqa tolmaǵan balasyn asyraýǵa alıment tólemderin óndirý týraly sot aktileriniń oryndalýyna tekseris júrgizildi. Tekseris barysynda, boryshkerdiń 2013 jyldan osy kúnge deıin turaqty jumys orny men eńbekaqysy bola tura alımenttik tólemderin aýdarmaǵandyǵy anyqtaldy», - delingen baspasóz baıanynda. Atalǵan fakti boıynsha prokýratýra ákimshilik is qozǵap, keıinnen sottyń qaýlysymen, boryshker J. Rahımjanov 5 táýlikke ákimshilik qamaýǵa alý túrindegi jazaǵa tartylǵan.
Jalpy Astana qalasy Almaty aýdanynyń prokýratýrasy atalǵan máseleler boıynsha udaıy júıeli jumys júrgizýde. Soǵan oraı, mundaı jaǵdaılar týyndaǵan bolsa www.115.kz elektrondyq portaly men prokýratýra organdarynynyń www.prokuror.kz resmı saıtyna jazý arqyly júginýge bolatyndyǵyn habarlaıdy.
