Astanada alıment bereshegi bar 150 boryshkerge qumar oıyn oınaýǵa tyıym salyndy

ASTANA. KAZINFORM – Elorda prokýratýrasy alıment tóleı almaı júrip, qumar oıynǵa qomaqty qarjy salǵandardy anyqtap, olarǵa tyıym saldy. 

«Taldaý nátıjesinde 150 boryshker balalaryna 350 mln teńge qaryz bola otyryp, qumar oıyndarǵa qatysqany anyqtaldy. Bıyl 2,5 mln teńge alıment bereshegi bar boryshker býkmekerlik keńse arqyly 80 mln teńgege qumar oıyndarǵa qatysqan. Prokýratýranyń qadaǵalaý aktisi boıynsha jeke sot oryndaýshylary 150 boryshkerge qumar oıyndarǵa qatysýǵa tyıym saldy», - delingen qalalyq prokýratýra taratqan habarlamada.

Aqparatta aıtylǵandaı, tyıym boryshkerlerdiń aqshany orynsyz jumsaýyna jol bermeıdi. 

«2024 jylǵy 9 qyrkúıekte kúshine engen Qazaqstan Respýblıkasynyń «Oıyn bıznesi týraly» Zańyna sáıkes, elorda prokýratýrasy oıyn bıznesiniń uıymdastyrýshylaryna boryshkerlerdi qumar oıyndarǵa qatystyrmaýǵa shaqyrady. Qazaqstan Respýblıkasynyń Ákimshilik quqyq buzýshylyqtar týraly kodeksiniń 444-babyna sáıkes, atalǵan zańnamalyq talaptardy saqtamaǵan jaǵdaıda aıyppul salý, al qaıtalanǵan buzýshylyqtar úshin – lıtsenzııanyń kúshin toqtatý túrinde jaza qarastyrylǵanyn eske salamyz», - deıdi elorda prokýratýrasynan. 

Birer kún buryn SQO prokýrorlary alıment tóleı almaı júrip, qumar oıynǵa qomaqty qarjy salǵandardy anyqtaǵan edi.