Astanada Alǵys aıtý kúninde qandaı is-sharalar ótedi

ASTANA. KAZINFORM – Alǵys aıtý kúnine oraı Astanada ondaǵan túrli sporttyq, mádenı jáne tanymdyq is-sharalar ótedi. Bul týraly elorda ákimdiginiń resmı saıty jazdy.

Elimizde 1 naýryz – Alǵys aıtý kúni atap ótiledi. Bıyl Astanada Alǵys aıtý kúnin merekeleý taǵy bir mańyzdy oqıǵamen – Qazaqstan halqy Assambleıasynyń 30 jyldyǵyna arnalǵan is-sharalardyń bastalýymen este qalmaq. 

Mereke kúnderi mádenıet, sport, bilim berý uıymdary, elordalyq QHA jáne basqa da mekemeler qala turǵyndary men qonaqtary úshin túrli is-sharalar daıyndap otyr. Alǵys aıtý kúnine oraı Astanada salt-dástúrler men alǵys aıtýdyń túrli tásilderin damytýǵa baǵyttalǵan taqyryptyq kórmeler, balalar men oqýshylarǵa arnalǵan tárbıe saǵattary ótip jatyr. Jalpy, josparlanǵan is-sharalardyń barlyǵy qoǵamnyń táýelsizdik qundylyqtary tóńireginde toptasýyna, el birligi men patrıotızmniń nyǵaıýyna yqpal etedi.

27 aqpanda «AMANAT» partııasy men astanalyq QHA erikti jastar uıymdary dástúr boıynsha qart kisilerge kómek kórsetip, aýlalarynyń qaryn kúreıdi.

Dál osy kúni qarttar úıinde QHA-nyń dástúrli qaıyrymdylyq aktsııasy ótedi. Jurtshylyq úshin kontsert uıymdastyrylyp, etnomádenı birlestikterdiń ulttyq taǵamdarynan dám tatady.

Sondaı-aq, 27 aqpanda elordadaǵy №43 mektepte áleýmettik az qamtylǵan otbasylardan shyqqan balalarǵa arnalǵan «Birlik pen yntymaqtastyqqa 30 jyl» atty qaıyrymdylyq aktsııasy ótedi.

28 aqpanda qala mektepterinde «Qazaqstan halqy assambleıasyna 30 jyl» taqyryptyq synyp saǵattary ótedi. Naýryz boıy mektepterde ardagerlermen jáne QHA belsendilerimen kezdesýler, túrli is-sharalar uıymdastyrylady.

1 naýryzda elordadaǵy saltanatty sharalar mańyzdy oqıǵadan bastalady: Dostyq úıinde QHA mereıtoıyna arnalǵan «Qazaqstan halqy assambleıasyna 30 jyl» memorıaldyq taqtasynyń ashylý saltanaty bolady. Odan keıin halyqaralyq dóńgelek ústel ótedi, onyń barysynda Assambleıanyń mereıtoıyna oraı Qazaqstan Prezıdentiniń quttyqtaý sózi oqylady. Bul shara QHA-nyń 30 jyldyǵyna arnalǵan jyldyń resmı bastamasy bolmaq.

Odan keıin dóńgelek ústelge qatysýshylar «Qazaq eline myń alǵys» monýmentine barady, onda saltanatty túrde gúl shoqtaryn qoıý rásimi ótedi.

Sonymen qatar, áleýmettik jelilerde túrli etnostardyń jastardyń quttyqtaýlary bar vıdeo-chellendj bastaý alady.

Taǵy bir mańyzdy is-shara – halyqtyń muqtaj toptaryn qoldaýǵa baǵyttalǵan «Qaıyrymdylyq kerýeni» aktsııasynyń bastalýy.

Dál osy kúni, 1 naýryzda Dostyq úıinde shyǵarmashylyq toptardyń qatysýymen merekelik kontsert ótedi. Balalarǵa merekelik dastarhan uıymdastyrylady.

Buǵan deıin habarlanǵandaı, Almatyda Alǵys aıtý kúnine arnalǵan is-sharalar 25 aqpanda bastalady.