Astanada alǵashqy Yoga Fest ótti
ASTANA. QazAqparat - Búgin Elordanyń jańa Ioga-saıabaǵynda alǵashqy Yoga Fest festıvali ótti, dep habarlaıdy QazAqparat.
Shara aıasynda jappaı saýyqtyrýǵa negizdelgen ıoga sabaqtar júrgizildi. Merekelik sharaǵa ár túrli jastaǵy qala turǵyndary men qonaqtary qatysty. Erekshe festıvalge nıet bildirgenderdiń qatary az bolmady, 100-den astam atsalysty, dep jazady qala ákimdiginiń saıty .
Festıval qoǵamdyq qaıyrymdylyq qory, menshikti kommýnaldyq qor jáne Úndistan Elshiligine qarasty úndi mádenı ortalyǵynyń yqpalymen uıymdastyryldy.
Shyraıly shara aıasynda kelýshilerge úndi mádenı ortalyǵynyń doktory, jattyqtyrýshy Brıdjesh Gýpt jattyǵý sabaǵyn ótkizdi. Óz isiniń bilgiri qatysýshylarǵa ejelgi ónerdiń negizgi tetikterimen tanystyryp, durys ári júıeli tamaqtanýdyń tásilderin kórsetti.
Sondaı-aq, festıval aıasynda kórermender ónerli toptyń mýzykalyq qoıylymdary men bılerin tamashalady. Úndi halqynyń bansýrı aspabymen eki eldiń týyndylary oınaldy. Vegetarıandyq as mázirin daıarlaýdyń joly da shara aıasynda usynyldy.
Shara sońynda fleshmob uıymdastyrylyp, salaýatty ómir saltynyń sımvoly retinde kókke 100 jasyl shar ushyryldy.
Yoga Fest jınalǵandarǵa jarqyn kóńil-kúı, kúsh-qýat, qýanysh syılaǵany sózsiz. Festıvalge qatysqandar sharanyń buqaralyq sıpatqa ıe ári salaýatty ómir saltyn nasıhattaýdyń taptyrmas joly ekenin jetkizdi. Ári osyndaı mazmundaǵy mádenı sharalardyń jalǵasyn tabýyn qalaıtyndaryn da bildirdi.
