Astanada alǵashqy saılaýshylar daýys berip jatyr
ASTANA. QazAqparat - Búgin 26 sáýir - QR Prezıdenti saılaýy kúni. Osyǵan baılanysty búgin tań sáriden barlyq saılaý ýchaskeleri ashylyp, olarda alǵashqy saılaýshylar daýys bere bastady.
QR Prezıdenti janyndaǵy Memlekettik basqarý akademııasynda ornalasqan №104 saılaý ýchaskesiniń tóraıymy Aıman Dúısenovanyń aıtýynsha, atalǵan ýchaskege 2662 saılaýshy tirkelgen.
"Olardyń eń belsendileri esik ashyla salysymen kelip, daýystaryn berýde. Bizde alǵashqy 50 kisige túrli syılyqtar daıyndalǵan. 18 jasqa bıyl tolyp, birinshi ret daýys berýge qatysyp otyrǵan azamattarymyzǵa da syılyqtarymyz bar. Óıtkeni bul kún barlyq qazaqstandyqtar úshin erekshe este qalatyn kún bolýy tıis", - dep atap ótti ol.
Osy ýchaskede eń alǵashqylardyń biri bolyp daýys bergen zeınetker Natalıa Grıgorenkonyń aıtýynsha, ol úshin bul kúnniń mańyzy zor.
"Shynymdy aıtsam, men tań atpaı oıanyp aldym. Óıtkeni bul kún barlyǵymyz úshin mańyzdy. Erteń beıbit jáne baqytty kúnde ómir súrgimiz keledi. Sol úshin de búgin durys tańdaý jasaýǵa tıispiz", - deıdi saılaýshy.
