Astanada alǵashqy mamandandyrylǵan ambýlatorlyq koloproktologııa ortalyǵy ashyldy
ASTANA. 26 shilde. QazAqparat - Astanada №1 Qalalyq aýrýhananyń bazasynda ambýlatorlyq koloproktologııa ortalyǵy jumys istep keledi.
Bul elordada koloproktologııalyq aýrýlardy emdeıtin jalǵyz mamandandyrylǵan ortalyq bolyp tabylady. Bul týraly astana.kz saıty jazady.
Mundaı hırýrgııa №1qalalyq aýrýhanasynda kóp jyldan beri damytylýda. Qazaqstannyń jetekshi koloproktologtardyń biri medıtsına ǵylymdarynyń doktory, professor N. Mýn. qalalyq aýrýhananyń hırýrgııa bólim bazasynda jumys istep, kóp jyldaryn osy ǵylymǵa arnap, jeke koloproktologtar mektebin ashty. Onyń tárbıesinen ótken kolorektaldy hırýrgterdiń kóbi Qazaqstannyń túrli aımaqtarynda jemisti eńbek etýde.
Atalǵan ortalyqty qurýdyń negizgi maqsaty - kolorektaldy aýrýlarǵa shaldyqqan, jáne aýyr operatsııadan keıingi patsıentterge mamandandyrylǵan jáne joǵary mamandandyrylǵan medıtsınalyq kómek kórsetý.
«Ortalyqta patsıentterge bilikti konsýltatsııalar beriledi, barlyq qajetti tekserýler ótkiziledi (fýnktsıonaldyq, rentgenologııalyq, endoskopııalyq, ÝDZ-zertteýler jáne t.b.), sonymen qatar tájirıbeli dárigerler men medbıkelerdiń qadaǵalaýymen qajetti manıpýlıatsııalar jasalady. Barlyq proktologııalyq patsıentterdi hırýrgııalyq emdeý barysynda ınnovatsııalyq tehnologııalar qoldanylady, bul kúndizgi statsıonarda emdeýge múmkindik beredi»,- delingen qalalyq densaýlyq saqtaý basqarmasynyń aqparatynda.
Ambýlatorlyq emdeý patsıentterdiń ýaqyty men qarjysyn únemdeıdi. Ortalyq qalalyq emhanalardyń joldaýy boıynsha bıýdjettik (tegin) jáne aqyly negizde qabyldaý júrgizip, em-dom jasaıdy.
Japy, koloproktologııa - hırýrgııadaǵy jańa baǵyt, onyń damýy kez kelgen ekonomıkasy joǵary memlekettiń ajyramas bóligi bolyp tabylady. Adamnyń tamaqtaný sıpatynyń jáne gıpodınamııasynyń ózgerýine baılanysty asqazan-ishek joldary aýrýlarynyń qurylymynda toq ishek pen tik ishek patologııasy keńinen taralǵan.
