Astanada alǵashqy elektrondy kommertsııa ortalyǵy ashyldy
ASTANA. QazAqparat - Búgin «Qazpochta» AQ Astana alǵashqy elektrony kommertsııa ortalyǵyn ashty. Mamandandyrylǵan elektrondy ortalyq ınternet kommertsııa ókilderine qyzmet kórsetedi, dep habarlaıdy QazAqparat.
«Búgin biz Astanada alǵashqy elektrondyq kommertsııa ortalyǵyn ashyp otyrmyz. Sodan keıin Almaty men 16 oblys ortalyǵynda ashamyz. 2017 jyldyń jarty jylynda búkil Qazaqstandy qamtymaqpyz»,-dedi ortalyqtyń ashylýynda jýrnalıstermen áńgimelesken «Qazpochta» AQ basqarma tóraǵasy Baǵdat Mýsın.
B.Mýsınniń aıtýynsha, elektrondy kommertsııa naryǵy jylyna ortasha eseppen 25-30 paıyzǵa artyp keledi eken. Sondyqtan, ınternetpen saýda jasaıtyndarǵa jáne satyp alýshylarǵa yńǵaıly jaǵdaı jasaý úshin «Qazpochta» AQ elektrondy kommertsııa ortalyǵyn ashýdy qolǵa alǵan. Jalǵyz Astanananyń ózinde «Qazpochta» 40 ınternet dúkenge qyzmet kórsetetini belgili boldy.
«Astanada 40 ınternet dúkenge qyzmet kórsetip jatyrmyz. Biraq, olarǵa qyzmet kórsetetin oryn bolmaǵan. Bul ortalyq - sol ınternet dúkenderge ǵana qyzmet kórsetetin ortalyq bolady», - deıdi ol.
Aıta keteıik, Astanadaǵy alǵashqy e-ortalyq sol jaǵalaýda ornalasqan.
