Astanada alǵashqy mamandandyrylǵan samokat turaǵy qalaı jumys istep tur
ASTANA. KAZINFORM — Elordanyń Nura aýdanynda alǵash ret elektrsamokattarǵa arnalǵan mamandandyrylǵan turaqtar paıda boldy. Osy oraıda júıe qalaı jumys isteıdi? Arnaıy turaq beıbereket tastalǵan samokattar máselesin sheshýge qalaı septigin tıgizip jatyr? Osy jáne ózge de suraqtarǵa Q88 Turaqty damý aýmaqtary qaýymdastyǵynyń ókili jaýap berdi.
Búginde Astanada birneshe iri kıksherıng qyzmeti jumys isteıdi. Elektrsamokattardyń jalpy sany kompanııalar boıynsha mynadaı:
— Whoosh — 3 400 samokat;
— JET — 2 600 samokat;
— ıAndeks Go — 1 600 samokat.
Q88 qaýymdastyǵynyń atqarýshy dırektorynyń orynbasary Janat Chúkeevtiń aıtýynsha, joba azamattardyń kóptegen shaǵymynan soń qolǵa alyndy. Trotýar men jol boıyna tastalǵan samokattar jaıaý júrginshiler men kólik júrgizýshileriniń qozǵalysyna kedergi keltirip qana qoımaı, apatqa sebep bolyp jatyr.
Pılottyq joba aıasynda Nura aýdanynda samokat eń kóp shoǵyrlanǵan 10 núkte tańdaldy. Negizinen saýda ortalyqtary, qoǵamdyq saıabaqtar men jaıaý júrginshiler kóp júretin aýmaqtardyń mańy.
— Aýdan ákimdigi jáne kıksherıng kompanııalarymen birlesip adam jıi júretin jerlerde arnaıy jol belgileri men turaq aımaǵyn bildiretin syzbalar ornatyldy. Endi sapardy tek belgilengen orynda ǵana aıaqtaýǵa bolady, — dep túsindirdi Janat Chúkeev.
Buǵan deıin samokatty tek qosymshada belgilengen «vırtýaldy aımaqtarǵa» qoıýǵa bolatyn. Alaıda GPS júıesi dál bola bermeıdi de, paıdalanýshy samokatty trotýardyń qaq ortasyna nemese ǵımarattyń aldyna tastap ketse de, kartada durys turaqtalǵan bolyp kórinedi.
— Vırtýaldy aımaqtar — bul birneshe sharshy metr aýmaq. Biraq, samokatty aýmaq ishinde beıbereket tastalyp ketýi múmkin. Sondyqtan biz naqty belgiler men jol syzbalary bar fızıkalyq turaq engizdik. Bul paıdalanýshylardy vızýaldy túrde baǵyttap, tártip mádenıetin qalyptastyrýǵa septigin tıgizedi, — dedi qaýymdastyq ókili.
Onyń aıtýynsha, endi paıdalanýshy belgilenbegen aýmaqta jaldaýdy aıaqtaı almaıdy, al samokat arnaıy turaqqa qoıylmaıynsha, tólem jalǵasa beredi. Tek tehnıkalyq aqaý shyqsa, mysaly, batareıanyń taýsylyp qalýy sııaqty jaǵdaı qarastyrylǵan. Ol kezde tehnıkalyq qoldaý qyzmetine habarlasý qajet.
Ereje buzylǵan jaǵdaıda paıdalanýshyǵa eskertý jáne aıyppul jiberiledi. Eger buzýshylyq júıeli túrde qaıtalansa, akkaýnt buǵattalýy múmkin.
— Kıksherıng kompanııalarynda arnaıy «skaýt» jumys isteıdi. Olar kún saıyn kóshelerdi patrýldep, tártipti tekserip, qajet bolǵan jaǵdaıda samokattardy qaıta ornalastyrady, — deıdi Janat Chúkeev.
Atalǵan jumysqa iKomek jedel áreket etý jáne monıtorıng ortalyǵy da qosylady. Ortalyqta jańa ótinish klassıfıkatory ázirlenip, operatorlar samokat turaqtary boıynsha shaǵymdy jyldam óńdeýge úıretiledi.
— Baqylaý iKomek qalalyq monıtorıng jáne jedel áreket etý ortalyǵy, aýdandyq ákimdik, Astana qalasynyń jol polıtsııasy jáne kıksherıng kompanııalarymen birlesip júzege asyrylady. Messendjerlerde jobanyń barlyq qatysýshysy naqty ýaqyt rejıminde tártip buzýshylyq týraly aqparat almasatyn jumys toby quryldy. Mundaı tásil túsken shaǵymǵa jedel áreket etip, jumysty ońtaılandyrýǵa múmkindik beredi. Nátıjesi de baıqalyp jatyr. Bizdiń málimetke saı, beıbereket qoıylǵan samokattar sany 80–90%-ǵa azaıdy, — dedi Q88 qaýymdastyǵynyń ókili.
Qazir atalǵan bastamany elordanyń basqa aýdandaryna da keńeıtý máselesi qarastyrylyp jatyr. Alaıda jobany júzege asyrý úshin qosymsha qarjy resýrsy qajet.
Eske sala ketsek, elordada alǵash ret elektrosamokattarǵa arnalǵan arnaıy turaqtar ashylatyny týraly bıyl sáýirde belgili boldy.
Aıta keteıik, Qazaqstanda elektrosamokattarǵa nómir taǵý mindettelýi múmkin.