Astanada alǵashqy avtonomdy sýperkompıýter tanystyryldy
ASTANA. KAZINFORM — EXPO aýmaǵynda jasandy ıntellektpen jumys isteýge arnalǵan Qazaqstandaǵy alǵashqy avtonomdy sýperkompıýter tanystyryldy. Mamandar ony Ortalyq Azııadaǵy jasandy ıntellekti jáne úlken derekterdi taldaýǵa arnalǵan biregeı joba dep baǵalap otyr.
Bul júıe memlekettik organdar men iri kompanııalarǵa ınternetke qosylmaı-aq jasandy ıntellekti paıdalanýǵa múmkindik beredi jáne derekterdiń taralý qaýpin joıady.
— Bul baǵdarlamalar kesheni ár adamǵa jeke beriledi. Negizinen mınıstrlikter men iri kompanııalarǵa arnap jasadyq. Óıtkeni ol organdarda aqparattyq qaýipsizdik máselesi óte ózekti. Biz qatelespesem, álemde alǵashqylardyń biri bolyp, osyndaı boksty jarnamalap qoımaı, óndiriske shyǵaryp jatyrmyz, — dedi Neuro box kompanııasynyń negizin qalaýshy Aleksandr Pan.
MindIA platformasy — sýperkompıýterdiń negizgi elementi. Ol ártúrli neırondyq jelilerdi biryńǵaı keńistikke biriktirip, paıdalanýshylarǵa tsıfrlyq agentterdiń tutas komandalaryn qurýǵa múmkindik beredi. Jeke-jeke jumys isteıtin chat bottar bir arnaǵa biriktirilgen. Barlyq tilde tapsyrmalardy oryndaı alady.
— Bul joba adamdy almastyrýdy emes, onyń jumys tıimdiligin arttyrýdy maqsat etedi. Bir agent derekterdi taldaıdy. Ekinshisi mátin jazady, úshinshisi josparlaıdy. Tájirıbe barysynda júıe jobalyq qujattamanyń normatıvterge sáıkestigin tekserý, memlekettik satyp alýlarǵa arnalǵan spetsıfıkatsııalardy taldaý, medıtsınadaǵy klınıkalyq hattamalardy salystyrý sekildi jumysty oryndaı alatynyn kórsetti, — Neuro box kompanııasynyń ókili Tólegen Omarbekov.
Onyń aıtýynsha, «NeuroBox» jabyq júıesi barlyq málimettiń júıe ishinde saqtalýyn qamtamasyz etedi. Mundaı model aqparatty qorǵaýdyń joǵary deńgeıi qajet uıymdar úshin óte ózekti.
Mysal retinde ázirleýshiler ótken jyldyń sońynda sýperkompıýter Ónerkásip mınıstrliginiń kásibı standarttar ázirleý jobasynda qoldanylǵanyn aıtty. Buryn bul jumys eki aptaǵa sozylsa, júıe nátıjeni nebári 4,5 mınýtta shyǵarǵan.
Aıta keteıik, shilde aıynda Memleket basshysy Qasym-Jomart Toqaev Alemcloud Ulttyq sýperkompıýter ortalyǵyna baryp, NVIDIA H200 grafıkalyq protsessorlary bazasynda jasaqtalǵan sýperkompıýterdi iske qosty.
Qazaqstandaǵy IT-kompanııalardyń sany 18 myńnan asty, sońǵy úsh jyldaǵy ósim 16 paıyzdy qurady. 1700-den astam qatysýshyny biriktiretin Astana Hub halyqaralyq tehnoparki salanyń mańyzdy draıverine aınaldy. Rezıdentterdiń jıyntyq túsimi 1,2 trln teńgege jetip, eksporttyq tabys 140 mlrd teńgeden asty.