Astanada alǵashqy AES salynatyn oryndy tańdaýǵa arnalǵan semınar ótip jatyr
ASTANA. KAZINFORM – Astanada MAGATE ókilderiniń qatysýymen Qazaqstandaǵy alǵashqy AES salynatyn oryndy tańdaýǵa arnalǵan semınar ótip jatyr.
Bes kúndik semınarǵa MAGATE ókilderinen bólek Energetıka mınıstrliginiń, Ekologııa jáne tabıǵı resýrstar mınıstrliginiń, Atom energetıkasy jónindegi agenttiktiń, «Qazaqstan atom elektr stantsııalary» JShS-niń mamandary shaqyrylǵan.
Semınarda AES salýǵa qolaıly oryn tańdaýdaǵy MAGATE usynatyn halyqaralyq standarttar men prıntsıpter talqylanbaq.
«Qazaqstan atom elektr stantsııalary» JShS bas dırektorynyń orynbasary Rınat Oqasov semınar barysynda Almaty oblysy Úlken kentiniń qaı tusy AES qurylysyna qolaıly ekenin ǵylymı turǵyda talqylaý kózdelip otyrǵanyn aıtady.
- Bul – Almaty oblysynyń Jambyl aýdany, Úlken kentiniń aýmaǵy. Endigi mańyzdy qadam – stansa oryn tebetin alańdy tikeleı anyqtaý. Sol úshin MAGATE mamandarynan bizge kelip, antropogendik, tehnogendik jáne basqa da faktorlardy eskere otyryp oryn tańdaýdaǵy tájirıbesin bólýdi suraǵanbyz. Osy bilim bizge AES-tiń ornyn tańdaýǵa kómegin tıgizedi dep esepteımiz, - deıdi ol.
- Birneshe jyl boıy biz Kýrchatov qalasyn da, Úlken kentin de zerttep keldik. Endi burynǵydan da tereń zertteýler júrgizý qajet bolyp otyr. Onyń ishinde ınjenerlik-tehnıkalyq jumystar da bar. Sondaı-aq, seısmologııa taldaýlary, meteorologııa taldaýlary, topyraq pen sý taldaýlary de esepke alynady. Tipti sol mańdaǵy eldi mekenniń áleýmettik-ekonomıkalyq faktory da tereń zerttelip jatyr, - dedi Rınat Oqasov.
Semınardyń ashylýynda Atom energetıkasy jónindegi agenttik tóraǵasynyń orynbasary Áset Mahambetov pen MAGATE sarapshylarynyń tobynyń jetekshisi Lı Hen Ý sóz alyp, saladaǵy qaýipsizdik máselelerine keshendi turǵyda kelý mańyzdy ekenin atap ótti.
- Biz ıadrolyq qaýipsizdik, qorǵanys jáne ashyqtyq máselelerine birinshi kezekte kóńil bólemiz. Qazaqstan MAGATE standarttary men úzdik halyqaralyq tájirıbelerdi múltiksiz ustanady, - dedi Aset Mahambetov.
Buǵan deıin AES salýǵa memleket kepildigimen qaryz tartylýy múmkin ekenin jazǵan edik.